Belgium head coach thar Roberto Martinez

Everton, Wigan leh Swansea manager hlui Roberto Martinez chu Belgium head coach thar ni turin an ruat.

Belgian Football Associa-tion hian manager hna ruak hi online hmanga a duh apiang dil theih turin an chhawp chhuak a, manager thar an neih thu hi an official Twitter account hmangin an puang leh bawk.

Kum 43-a upa Martinez hi Goodison Park-a kum thum a cham hnuah May thla khan Toffees-in Premier League-a 11-na a nih phak pui chauh avangin an ban a, tunah chuan club football kalsanin ram enkawl hna a thawk tawh ang. Spanish manager hian Euro 2016 zawha kal chhuak ta Marc Wilmots a thlak dawn a ni.

Wilmots leh Martinez

Marc Wilmots hian Belgium enkawl hna a chan hma hian kum li chhung an ram hi a enkawl a, FIFA ranking-a pahnihna hial a thlenpui theih avangin fak a hlawh hle. Amaherawhchu inelna lian thamah Wilmots-a hnuaiah Belgium an che ṭha tawk lo a, 2014 FIFA World Cup-ah Argentina hneh loin quarterfinal-ah an tla a, Euro 2016-ah champion tura rinkai ni mah se quarterfinal-ah Wales hneh loin an tla leh bawk.

Belgian Football Associa-tion-in an result beisei ang an hmuh loh avangin coach thar an zawng a, Manchester United manager hlui Louis van Gaal chu sawi rik zingah awm mah se kum naupang zawk Martinez chungah mawhphurhna an hlan ta a ni. Spanish manager Martinez hi a inkhelh hun laiin Spain aiin England-ah hun a hmang tam zawk a, manager hna pawh a khelh ṭhinna Swansea City-ah bul ṭanin Football League One-ah a champion pui a, Wigan Athletic chu FA Cup-ah a champion pui bawk.

2013 FA Cup-a Wigan an champion ṭum hian Premier League aṭangin an thla hniam a, Everton manager David Moyes-a'n Manchester United a pan avangin English manager hmunruak luah khatin Toffees a pan. Everton ṭantute club a enkawl dan hmangah Martinez hi duh lo mah se Spanish manager hian season liam ta khan FA Cup-ah semifinal a thlenpui a, knockout football-a a sulhnu ṭha tak hi Belgium FA mit titlungtu niin a lang.