Chak lo Sharapova hma hun chiang lo
Maria Sharapova chu Australian Open-ah hneh nei loin a tla nghal a, world number 1 hlui hian nakkumah Melbourne Park-ah inelna hmachhawn turin a kir leh ngei dawn em tih a sawi chiang thei lo.
Rod Laver Arena-a inkhelah Sharapova hian seeded 19-na Donna Vekic chu 6-3, 6-4 in a ngam lo. Grand Slam vawi nga champion tawh hian duhsak taka wildcard pek a nihna a chhawr ṭangkai thei lo a, world ranking chhuak tharah chuan a sang 350 zingah pawh a tel phak tawh lo ang.
Britain nula chhuanvawr, an ram number 1 ni bawk Johanna Konta chu a match hmasa berah Ons Jabeur hneh loin a tla ve bawk. Seeded 12-na hi world number 78 lakah hian 6-4, 6-2 in a tlawm a ni.
Hma hun chiang lo
Damdawi hman phal loh a hman vangin thla 15 hrem a ni a, hremna a hman zawh hnuah dar (shoulder) leh hnungzâng na vangin a inkhel mumal thei lo rei hle. Nikum September thlaa khelh US Open hnuah tun ṭum hi tournament a khelh leh vawi hnihna chauh a ni.
Season tharah Australian Open i khel leh ang em tih zawhna chhangin Sharapova chuan, "Ka hre lo, tunah chuan engmah ka sawi lawk thei lo. Thla 12 lo awm turah hian thil thleng thei tam tak a awm, sawi lawk a harsa a ni," a ti.
Kum 32 mi chuan sawi zawmin, "Inelna buatsaihtu lamin min duhsak hle, hetiang hun ṭha min buatsaihsak avangin ka lawm," a ti. Russian nula hian 2008 khan Australian Open nomawi hi a chawi, 2010 hnu lama a tlak hma ber ṭum a tawng.
Pliskova a chak
Champion tura rinkai zinga mi Karolina Pliskova chuan a match hmasa berah fiahna hautak a hmachhawn ve nghal a, a khingpui tun hnaia player langsar pawh ni phak lo Kristina Mladenovic chu 6-1, 7-5 in
a hneh.
World number 2 hian set khatna hi minute 25 chhung lekin harsa lo takin a la, season kal laia ngam loh la tawng lo Pliskova hi set hnihnaah erawh a talbuai ve hle - game nga ngawt a hloh avangin set hloh thei dinhmunah a ding hman, mahse a tawpah erawh a chungnung zawk.
Pliskova hian a match lehpekah chuan world number 72 Laura Siegemund leh Coco Vandeweghe inkhela chak zawk a hmachhawn leh ang. Player langsar dang Belinda Bencic, Madison Keys leh Maria Sakkari te chuan an khingpui ṭheuh hnehin second round an lut bawk.