Huaisen takin Osaka a champion

Dinhmun hniam zawka a din lai pawhin a beidawng ve ngai lo, set a hloh bakah a service chhuhsak ni mah se Naomi Osaka chu huaisen takin a tho chhuak. Japanese star hian world number 1 hlui Victoria Azarenka hnehin a vawi hnih nan US Open nomawi a chawi.

New York khawpuia Inrinni zan, keini lama Pathianni zing khan US Open hmeichhe singles final khelh a ni. Seeded palina Osaka hian darkar khat leh minute 53 chhungin 1-6, 6-3, 6-3 in hnehna a chang - Grand Slam nomawi pathum a chawi tling ta.

World number 1 hlui, tun dinhmuna world number 9 ni lai Osaka hian US Open final vawi hnih bakah Australian Open final a khel tawh a, Grand Slam final pathum a inlanah hnehna a chang vek.

Arthur Ashe Stadium-ah mipui an awm lo, official leh media mi tlemte bak hmuh tur an awm lo. Final boruak hot tak awm lo mah se inkhel erawh a hmuhnawm dan a pangngai, theihna nei sang leh tun hnaia khel ṭha tluang an nih avangin inkhel hmuhnawm an chhawp chhuak.

Set khatna chu Azarenka ta a ni - Osaka zawkin game khat chauh a la. Set hnihnaah pawh Belarus star zawkin game thum la zawnin 3-0 in hma a hruai fal, champion tur a chiang tawha ngaih a ni. Mahse tournament danga a khelh ang bawkin Osaka a la beidawng ve lo.

Game an khelh chhunzawm 12 zinga 10 ngawt a la thei a, chak lo tura ngaih kha a chak zawkah a ṭang let daih. Hnehna a chang a, chak lawm nan court-ah muin a chunga van dum pawl chu a thlir; 2018 khan he hmunah hian hlawhtlinna a lo chang tawh bawk a ni.

Grand Slam final inkhel pawimawh takah set a hloh a, set hnihna pawh hloh leh mai tura ngaih a ni. Unforced errors a ngah a, a service a ṭhat tawk loh bawk avangin a dinhmun a chhe takzet, player tam zawk chu ni se an beidawng tawh ang.

Ni danga a tih ṭhin ang bawkin a ṭhutnaah ngui takin a ṭhu a, hruk puanin (towel) a lu a khuh; a ngaihtuahna a sawrbing tih a chiang. US Open 2018 leh Australian Open 2019 final ang bawkin rin hlawh lo a nih hnuah a tho chhuak.

US Open inbuatsaihna Western and Southern Open-ah khan player pahnih hian final an lut a, hliam vangin Osaka hi a inlan lo. Major tournament-ah pawh inlan loh mai tum mah se a inkhel lui, a malpui hliam hi 100% in la dam lo mah se a tibuai hran lo tih a lang.

Kum 22 mi Osaka chuan, "Season hnih liam taa thil thleng ang mai kha a la ni reng, dinhmun hniam leh hnuaihnung zawka ka din hnuah ka tho chhuak. Inkhel hautak leh hahthlak tak a ni a, final ka khelh hmasak ai kha chuan tawnhriat ka ngah tawh avangin ka inringtawk zawk," a ti.

US Open final a khelh hmasak hian Serena Williams nen an inhmachhawn, American star Serena hian buaina a siam a, ṭawngkam mai lo tak takin umpire a bei hial - boruak chhia hian Osaka tana lawmman sem boruak nuam tak tur pawh a tichhe phak.

Kuminah Covid-19 vangin tourna-ment kalphung tihdanglam ngai a tam, champion nomawi pawh inhlan chhawn ni loin Osaka hian dawhkana an chhawp chhuah sa chu amahin a chawi, hlantu awm lo mah se a hlutna a nep phah chuang lo.

Fapa a nei tawh a, chhungkua din an tum hnuah mimal harsatna hrang hrang a tawk tawh - 2017 phei kha chuan Azarenka hi Wimbledon hnu lamah tournament khelh a nei tawh lo. Hun harsa a paltlang hnuah tennis khel turin a lo kir leh a, kum 31 mi ni tawh mah se a la thiam reng.

Tun hnaia tournament a khelh hnu-hnung pahnihah Azarenka-i'n final a lut thei; US Open nomawi a chawi loh chhan pawh set hnihna an khelh laia a inthlahdah zeuh vangah a ngaih theih. Australian Open champion vawi hnih ni tawh hi a vanneih ṭum chu ni se US khawpuiah a hlawhtlin a rinawm.

Azarenka chungchang sawiin Osaka chuan, "Nang nen hian final khelh fo ka duh lo, a hautak tak zet zet a ni. Ka naupan lai khan i inkhel hi ka en fo a, nangmah aṭang hian thil tam tak ka zir chhuak a ni," tiin a khingpui a fak.