Pre-season tour nei turin ISL club inbuatsaih

October aṭanga khelh ṭan tur Indian Super League-in thawm a nei zel a, ISL club pariatte chu pre-season camp nei turin an inbuatsaih mek hlawm a, Euorpe leh Asia khawmualpui chu camp neih an tumna langsar a ni hlawm.

Champion lai Chennaiyin FC chuan season hmasaa camp an lo neih tawhna Italy-ah pre-season camp neih an tum a, coach Marco Materazzi-a te ramah hian Italian club engemaw zat chu practice match an khelhpui dawn a ni. Atletico de Kolkata pawhin season hmasaa training an lo neih tawhna hmun Spain bawk an pan dawn a, Pune City chuan Spain-ah vek hian training an nei bawk ang.

FC Goa leh Mumbai City chu Dubai khawpui lamah training camp nei tura ngaih an ni a, anni pahnih hian an kalna tur hi chiang takin an la sawi lo thung. Goa hian season hmasa pre-season camp an neih ṭumin UAE club engemaw zat an khelhpui a, nikuma an hmachhawn zinga mi UAE Arabian Gulf League club Al Shabab chu kuminah pawh hian an hmachhawn leh tura ngaih a ni.

Delhi Dynamos chuan an camp neihna tur hmun chiah puangzar loin Northern Europe emaw Central Europe a nih tur thu an sawi a, Europe hmar lam ram zingah Ger-many, Denmark, Norway leh Swe-den-te chu an pre-season neihna tur hmuna ngaih an ni deuh ber.

NorthEast United chu South Africa-ah pre-season tour nei tura beisei an ni a, Kerala Blasters chuan Singapore emaw Thailand-ah training an nei ang.

Hetihlai hian The Highlanders (NorthEast United) chuan Chelsea reserve team tana lo khel tawh Brazilian defender Gustavo Laz-zaretti chu an lalut bawk.