Great Britain flag keng tur Murray

Olympic leh Wimbledon champion Andy Murray chu Rio Olympic-a Great Britain flag keng tura thlan a ni, Inrinni zing hian Maracana Stadium-ah opening ceremony neih tur niin he hunah ram hrang hrang aṭanga infiammi kalkhawmte an inlan dawn a, ram pakhatin flag kengtu pakhat zel an nei ang.

Great Britain flag keng tur hian boxer Nicola Adams leh rower Katherine Grainger te hming langsar mah se Davis Cup-a an ram champion puitu Murray thlan a ni ta zawk a, an ram chanchina tennis player-in hetiang dinhmun an chan vawi khatna tur a ni.

Kum 29-a upa Murray chuan, "London-ah khan tawnhriat ka lo nei tawh a, Rio-ah hian medal la turin ram tan 100% ka theihna ka hlan ang. Khawvela infiamna lian leh ropui bera kan ram flag ka keng thei tur hi ka lawmin ka phur hle. Infiamna khawvela hun ka hman chhunga ka thil hriatreng tawh tur leh theihnghilh ngai loh tur a ni a, nakinah inchhung taka ka la sawi ṭhin tur a ni ang," tiin a sawi.

Rio Olympic-ah hian British Olympic Association chuan in-fiamna kawng hrang 25-a inlan turin athlete 366 zet an tir a ni.