China lakah Brazil an lian

Nilaini zan khan Rio Olympic hmeichhe football bik chu khelh ṭan a ni a, a thlengtu Brazil chuan China 3-0 in an sawp.

Olympic Stadium-a inkhelah Brazil tan Mo-nica Hickmann Alves, Andressa Alves leh Cris-tiane Rozeira ten goal an khung. 2012 London-ah khan Brazil hi quarterfinal-ah an chak lo a, kuminah erawh an rama inkhel an nih vang leh player an neih ṭhat vangin champion tura rinkai an ni.

Brazil tan match 104 a khelh aṭanga goal 102 khung thei striker Marta chuan ram tan goal khung belh rih lo mah se China defender-te tan a hnawksak hle.

Inkhel dangah Canada tan Janine Beckie chuan inkhel ṭan aṭanga second 20-na lekah Australia lakah goal a khung a, hei hi Olympic hmeichhe football chanchina goal lut rang ber niin an ram hi 2-0 in hnehna a chan pui.

Olympic hnuhung vawi li aṭanga ṭum thum 2000, 2004 leh 2008-ah te pathumna dinhmun luah thei Germany chuan harsatna nei loin Zim-babwe 6-1 in an sawp a, Sweden chuan South Africa lakah 1-0 a hnehna changin USA chuan a vawi khat nana Olympic-a inlan ve New Zealand lakah zahngaihna lantir loin 2-0 in an hneh bawk.