Infiamnaah thianghlim lo a tam - Phelps

Olympic chanchina mimal medal dawng hnem ber tawh Michael Phelps chuan infiamnaah thil thianghlim lo a awm fo thu leh inelna a hmachhawn ve tawhah pawh dik lo awm ṭhin ngeia a hriat thu a sawi chhuak.

Olympic gold medal 18 dawng tawhtu Phelps chuan, "Thil dik lo tih duhtu leh dan bawhchhe
ṭhinte hi dan an harsa a, thuneitu tan pawh hmalak a harsa hle ang tih a chiang. Engtiklai aṭanga inrawlh nge tih pawh hriat a harsa tawh a, Olympic-a ka lo inlan ve tawh
ṭhin-naah pawh khan thil ti dik lo an awm ṭhin tih hriat chuah a ni fo," a ti.

Kar hmasa khan Russian tui hleuh thiam pasarih zet chu dan an bawhchhiat vangin Rio Olympic-a inlan thei lo tura tih an ni a, he thil hian a tih lungngaih thu American tui hleuh chak hmingthang Phelps hian a sawi tel bawk.

Kum 31-a upa Michael Phelps hi a vawi li nan Olympic-ah a inlan dawn a, Inrinni zinga opening ceremony hman a nih hunah an ram Flag kengtu a ni ang.

Phelps hian London Olympic-a gold medal pali a lak hnuah tui hleuh a chawlhsan a, kum 2014 khan infiamna khawvelah lokir leh mah se zu rui chunga lirthei a khalh lai man a nih avangin thla ruk chhung hrem a ni. Kum 2015 April thla khan lokir lehin San Antonio, Texas-a neih US National Championship-ah khan inelna pathumah ngawt hnehna chang lehin Olympic-a inlan tura thlan a ni zui leh bawk.

Phelps chuan, "Thlan chhuah zinga ka tel hi ka lawm a, US aiawh tur ka nih hi inchhuanpui tham niin Flag kengtu ka nih dawn bawk avangin ka phur a, ram tana theihtawp chhuah turin ka inpeih," tiin a sawi.