I Day Football 2016 Dar 12:00-ah Chanmari Derby

Vawiin chhun dar 12:00 hian Lammualah Chanmari Derby khelh a ni dawn.

Chan-mari FC-in coach HC Zarzoliana thlak nan Lalsangzuala Hmar an lalut a, Zara hian vawiina an hmachhawn tur Chanmari West FC a enkawltu tawh. Semifinal luh inchuhna inkhel hi coach ṭha zawk zawnna inkhel a ni pah dawn a, I Day Football Group A inkhel hi a hmuhnawmin a ngaihnawm tel bawk ang.

Sawmfela leh Fela

Chanmari FC-in match hnih khelh tawh aṭangin goal li an khung tawh - Malsawmfela leh Lalruatfela Zote ten goal hnih ve ve an khung.

Chhinga Veng lamah Sawmfela'n yard 55 aṭangin goal ropui a khung a, Ramhlun South tlangval hian Aizawl FC lamah goal a khung tawh bawk. Fela Zote-in Aizawl FC lamah 'solo goal' pui tak entu mipuite a rawn hlui a, Chhinga Veng lama a goal khung pawh naran lo tak a ni.

Hriat tel ṭul erawh Chan-mari FC hi forward pahnih ringawta innghat an ni lo a, khelmuala lut pha chinin an hna an hriat tlan avangin inkhel hmuhnawm tak an la lanchhuahtir zel.

Tlarhma player-te'n ball ṭha an hmuh theih nan R. Malsawmltuanga a pawimawh ṭhin a, West Warrior coach Zara'n ball sem thiam player dang tur-in Lalmuansanga leh K. Lalnunzama (Valtea) te a kawl avangin midfield battle a hmuhnawm ang.

Danmawia leh Dampuia

Chanmari FC-in Sawm-fela leh Fela Zote te hming an lam ri reng a nih chuan Chan--mari West FC lamin Laldampuia leh R. Laldanmawia an nei ve tho!

West Warrior hian match hnih lekah goal nga an khung tawh a, goal khungtute chu captain Dampuia (3) leh Danmawia (2) te an ni.

Chanmari West FC winger pahnihte goal khung zinga goal khat pawh hi paih bo se West Warrior hian point an hloh dawn a, chuvangin player ṭha pahnih hi Zara tan an ṭangkai hle.

Chanmari FC tana chanchin lawmawm loh chu right back Lalrosanga hrem vangin a khel thei dawn lo a, Chhinga Veng an hmachhawn ṭuma left back-a awm Thomas Lalengkima chu Lunglei tlangval Rosanga awmna lamah insawn pheiin vei lamah Ramfangzauva a awm thei ang. Chanmari FC-in West Warrior hi dan an tum a nih ngai chuan field sir lam aṭanga ball ṭha lut tur a dan theih a ṭul dawn a ni.

Eng nge an sawi?

Chanmari West coach Zara chuan, "Chanmari FC ka enkawl lai khan ka club hlui Dinthar FC ka hmachhawn a, ka buai phah lo. Tun ṭumah pawh hian Chanmari FC hi kan khingpui dang ang tho an ni a, keini tana pawimawh ber chu point a ni. Chak tumin theihtawp kan chhuah ang a, semifinal thlen ngei hi kan duh a ni," tiin Vanglaini palai a hrilh.

Chanmari FC manager C. Lalthanmawia chuan, "Chanmari West nen hian inlaichinna ṭha tak kan nei a, khelmual pawnah pawh kan boruak a ṭha hle. Chutihrualin khelmual chhungah chuan chak loh kan duh lo a, MPL2 opening match-a kan draw tih loh kha chu kan la hneh vek a, kan record ṭha tak chhawm nun zel hi kan tum a ni," tiin team
ṭha zawka a inngaih thu a sawi.