Man City-ah Gabriel Jesus a lut

Coach thar Pep Guardiola kaihhruaina hnuaia khel tur Manchester City-in player thar an nei leh ta - Brazilian winger Gabriel Jesus chu Palmeiras aṭangin pound maktaduai 27-in an lalut a, a man hi a khelh ṭhat dan a zira pound maktaduai 4 vela pung leh thei tura tih a ni.

Kum 19-a upa South American rawlthar duhawm ber ang hial an sawi Jesus hian Etihad Stadium-ah kum nga chhung khel turin contract a ziak a, mah se December thlaa Brazil football season tawp thlengin Palmeiras-ah hian a khel leh phawt ang.

Brazilian Serie A season hman zawh taka 'Best Newcomer'-a an thlan Jesus hian Palmeiras tan match 67 khel tawhin goal 26 a khung a, season hman zawh takah khan Serie A top scorer-a ni.

City hian Colombian club Atletico Nacional aṭangin pound maktaduai 4.75-in forward Marlos Moreno an lalut leh dawn bawk. Kum 19 chauha upa Moreno hian Colombia tan vawi sarih inlan tawh mah se a la naupan avangin La Liga club Deportivo La Coruna lamah intuai hriam turin loan-in a kal rin a ni.

Manchester City manager thar Pep-a'n Everton aṭangin John Stones lakluh an tum a, tun nipui transfer bazar-ah Ilkay Gundogan, Nolito, Oleksandr Zinchenko, Aaron Mooy leh Leroy Sane te an lakluh tawh bawk avangin pound maktaduai 100 chuang an seng ta.