AFC-in Chhinga Veng an pet chhuak
Ningani I Day Football-a Aizawl FC leh Chhinga Veng inkhelah football ropuina phochhuah a ni - hun pek belhah goal thum a lut a, hun tawp hamrik a rik ruala chungnung zawk chu 3-2 a chak Aizawl FC an ni.
Chhinga Vengin team ṭha tak an nih thu sawi ṭhin mah se, match thum inkhel an hmachhawn tawhah point khat chiah an la hlawhchhuah avangin I Day Football-ah beisei tur an nei tawh lo a, MPL kaithar club tan bul ṭan dan duhawm a ni lo.
Tute nge inlan?
Aizawl FC coach K. Malsawmkima'n 4-5-1 for-ma-tion hmangin tlarhmaah Bright Middleton Mends a maltlat tir a, Ghanaian striker thlawp tur hian captain Rohmingthanga chu tawlh hmatir niin right wing-ah inhliam Albert Zohmingmawia aiawh turin rawlthar Rochharzela dah a ni.
Chhinga Veng coach Lalremtluanga'n 4-3-3 formation hmangin tlarhmaah M.S. Dawngliana, Lalkhawpuimawia leh Vanlallawma te a dah a, MPL kaithar hian Mizo club zinga I League khel hmasa ber hneh an tum tih a chiang.
AFC an nawi
Aizawl FC-in inkhel ṭantir lamah Chhinga Veng nawr tum viau mah se an zuam ang ngawtin Chhinga Veng an nem lo a, chance nei hmasa zawk chu Chhinga Veng an ni - minute 10-na lekah winger Vanlallawma'n Aizawl FC woodwork a tauh per a, Dawngtea'n a hun ṭha neih a khawhral zui ve bawk.
Minute 18-naah erawh chance nei ngun Chhinga Vengin an pet goal ta nge nge a, Kelkang tlangval Lalkhawpuimawia'n Aizawl FC defender Lalramchullova tihsual chhawr ṭangkaiin an hmahruaina goal a khung a, I Day Football champion lai tlarhnungin beisei an phak lo.
Hei le Aizawl FC!
Second half-ah Aizawl FC-in chawlh-lawk an chhawr ṭangkai tih a lang a, ṭan aṭangin minute 10 a liam hman chauh tihah Rochharzela'n an si phurh sutna goal a khung. Chhinga Veng rawlthar Chhara hian left back Ricky Lallawmawma ke aṭanga chhuak goal-a chantir tur hian a duhnaah tak ball a dah.
An veng lama a goal khung lawm duh lotu winger Rochhara hian chance nei lehnghal mah se hnai set sawt
aṭangin a pet over.
Goal thum chu
Team pahnihin point an insem mai dawna a lan tawh hnu minute 90-naah Bright Mends-a'n Lalremsanga tan a siamsak a, substitute bench aṭanga tlan lut Remsanga tan khung harsa a ni lo.
Aizawl FC hlim au thawm pawh a reh fel hmain ball-in Ruatthara kut a per avangin I Day Football champion team hian penalty an chawi.
Bawngkawn tlangval Dawngtea'n boruak sang tak hnuaiah harsatna nei loin penalty a khung a, a la tawp lo cheu! Aizawl FC-in an huaisen rah an seng a, hun pek belhah Brandon VL Remdika'n Aizawl FC goal thumna a khung - hun a tawp zui a, Chhinga Veng tan ui taka khelmual chhuahsan bak tih theih a awm lo.
A tawpah Chhinga veng tlarhnung a buai a, chak tum luatah an pawng nawr a, awmze nei loin an tlan chhuak a, an goal an veng tawh lo a, a tawpah an tuar - point khat hmu theiin point an hawn lo
Mala a lawm lo
Minute 78-naah Ruatthara'n foul (?) vangin freekick a chawi a, a chet dan mawi loh avangin yellow card pek zui a ni. Referee thutluknaah Aizawl FC coach K. Malsawmkima a lungawi lo a, a lungawi lohna a lantir nasat avangin technical area-ah a awm phalsak a ni lo.
Aizawl FC coach K. Malsawmkima chuan, "Engmah sawi tur ka nei lo, kan chak avangin ka lawm. Chu zawng chu sawi tur ka neihchhun a ni. Match official chungchangah chuan an tlin tawk leh phak tawkin an ti-ah ka ngai," tiin inkhelh zawh-ah Vanglaini palai a hrilh a, a lawm lo hle.
Chhinga Veng manager H. Lalrem-ruata chuan, "Kan nawr nat vanglai takin kan left back Lalrozama Fanai a inhliam a, player dang kan neih loh avangin midfield-a khel kan captain Joseph Lalnunpuia kan pawh let a ngai a, kan buai a ni. Kan tawnhriat ngah loh kan tuar a, tlarhma kan nawrin a hnung lam kan ngaihthah lutuk ṭhin a, mahnia ball ken tlang theihah kan naute an inringtawk lo ṭhin, " tiin an chak loh chhan chu tawnhriat an neih tlem vang a nih thu Vanglaini palai hnenah a sawi.
Group A - Result, Fixtures & Standing
Aizawl FC FC 3 - 2 Chhinga Veng FC
AFC : Rochharzela 55' ; Lalremsanga 90';
Brandon VL Remdika 90+4
CVFC : Lalkhawpuimawia 18'; MS Dawngliana 90+2
Vawiin Inkhel Tur
12:00 PM Chanmari FC Vs Chanmari West FC
August 6, Inrinni
2:45 PM Chhinga Veng FC Vs AIFF Under 19
August 8, ThawhṬanni
2:45 PM Chanmari West FC Vs Aizawl FC FC
August 9, Thawhlehni
2:45 PM AIFF Under 19 Vs Chanmari FC
# Team Pld W D L GF GA GD Pts
1 Chanmari FC 2 2 0 0 4 1 3 6
2 Aizawl FC 3 2 0 1 6 4 2 6
3 Chanmari West FC 2 1 1 0 5 4 1 4
4 Chhinga Veng FC* 3 0 1 2 5 8 -3 1
5 AIFF Under 19 2 0 0 2 1 4 -3 0
* Chhinga Veng-in semifinal an lut thei tawh lo.