I Day Football 2016 Chanmari West FC = Chanmari FC
Chanmari FC-in player 10-a khel chungin Chanmari West FC lakah point khat an sual chhuak a, I Day Football semifinal lut hmasa ber an ni.
Republic Vengthlang tlang-val Lalruatfela Zote-in Chanmari tan minute 29-naah kawh zetin box pawn aṭangin a pet lut a, West Warrior-in first half tawp dawna R. Laldanmawia penalty hmangin an sut.
Minute 60-naah Chan-mari game siamtu R. Malsawm-tluanga hnawhchhuah a ni a, Lalsangzuala Hmar hoten ngai an awh leh tawh lo.
Derby chu
Chanmari FC coach Sanga'n Vanlalbiaa Chhangte chu a club hlui hmachhawn tir a, midfielder Rochhingpuia'n inkhel bul a ṭan bawk.
West Warrior lamin freekick aṭang bakin first half-ah goal hlauhawm an nei lo a, Chanmari lamin an phu ang ngeiin Fela Zote hmangin an khung.
BVT forward hlui hian box pawna ball per chhuak chu tiding khawmuang loin a hlap lut nghal a, Fela Zote hian match thum an khelh tawhah goal a la khung vek.
First half tawp lamah Chanmari FC an fimkhur lo a, midfielder Lalmuansanga pass chu R. Laldanmawia'n lalutin keeper Lalmuanawma lakah penalty a hlawh chhuak. Sialhawk tlangval hian a club hlui Chanmari FC lakah cool takin penalty a khung a, first half-ah 1-1 a ni.
Aizawl FC leh Chhinga Veng FC hnehtu Chanmari inkhel a mawi tluang zel a, nimahsela ṭum dang an pha lo tih nemngheh nan second half ṭan tirhah Lalmuanzova leh midfielder Lalrinchhana-te luhtir an ni.
Red Card
Minute 60-naah Chanmari West left back Calvin Zosiam-liana'n Thomas Lalengkima a tlawh thlu a, Chanmari midfielder MS-a'n referee lakah ṭawngkam ṭha lo a hman bakah mawi lo taka a chet avangin hnawhchhuah a ni.
Danmawia'n chakna goal khungtu nih a tum luatah vengtu nei lo Dampuia a hmu fuh lo a, captain Dampuia ball pek ṭha tak a khung loh bawk avangin point khatah an lungawi a ṭul. Goal hmahruai khungtu Fela Zote pawhin kawh takin a volley nawn leh a, West Warrior keeper Lalruatpuia'n a dan sak.
Chanmari West-in point thum an hlawhchhuah theih loh avangin semifinal lut turin an match hnuhnung berah Aizawl FC an hneh a ṭul ang.
Hneh loh la tawng lo Chanmari erawh point sarih hmuin semi final an lut chiang tawh thung a ni.
Eng nge an sawi?
Chanmari West FC coach HC Zarzoliana chuan, "Chak loh kan duh loh avangin goal venhim kan ngai pawimawh a, awmze nei loa nawr kan tum lo. Amaherawhchu player 10 laka goal kan khung loh avangin point hnih kan hlohah ka ngai," tiin Vanglaini palai a hrilh.
Chanmari FC coach Lal-sangzuala Hmar chuan, "Referee-in a tih tur a ti tawk lo a ni. Penalty an hmuh avangin kan si phurh min sut a, kan player pakhat an hnawhchhuah bawk avangin chak theihna turah point khat chiah kan hlawh chhuak," tiin a sawi.
Chanmari FC boss hian MS-a red card chungchangah MS-a'n referee laka a thusawi a hriat loh avangin sawi zui theih a neih loh thu a sawi tel bawk.
Chanmari hian AIFF Under 19 an hmachhawn hunah hrem vangin forward Malsawmfela leh midfielder MS-a te an chhawr thei lo ang.