Vawiin tlaiah hmingṭhat inchuh

Chhinga Veng FC-in transfer laiin thawm lian tak nei mah se group stage an paltlang dawn lo tih a chiang tawh. AIFF Under 19 tan semifinal kawng khar a ni tawh bawk avangin vawiin tlai dar 2:45-a Chhinga Veng leh AIFF Under 19 inkhel tur hi hmingṭhat inchuhna inkhel a ni thei ang.

MPL kaithar Chhinga Veng hian inhliam vangin buaina lian tak an nei a, amaherawhchu Aizawl FC laka point an hloh chhan erawh inhliam vang a ni lo - fimkhur loh leh ṭul loa talbuai vang a ni. Injury time minute hnih ral hnuah pawh an la inhnehtawk thei a, hun tawpa awmze nei loa an nawr vangin Chhinga Veng FC hi Aizawl FC draw thei ni loin hneh lotu tiha sawi theih an ni.

Chhinga Veng tan vawiin hi insiamṭhatna hun ṭha a ni. AIFF Under 19 hmaah hian Chhinga Veng-in MFA Cup champion thei team an ni tih lantir a ṭul a. Chumi tur chuan player pawh an nei
ṭha - Dawngtea, MKA, Joseph, Rozama, Mapuia etc te awmna club an ni.

AIFF Under 19-in Chhinga Veng bakah Chanmari FC an la hmachhawn dawn. Group A hmahruai mektu Chan-mari hian pakhatna ni chunga semifinal lut tura point thum an la mamawh avangin AIFF Under 19 tan chuan chak inbeisei ngamna chi niin a lang lo.

Floyd Pinto hote tan Mizorama hneh neih loh ringawt hi mual-phona a ni a, AIFF hotute hmaah insawi-fiahna nei turin point thum an mamawh.

Chanmari West FC nena an inkhelh ṭumin Mizo pathum captain Edmund Lal-rindika, Rohmingthanga leh Lalnun-tluanga te hma tawngah an awm a, goal khungtu midfielder Lalengzama Vangchhia-in inkhel bul a ṭan bawk. Mizo pasarih zinga paliin inkhel bul an ṭan a, AIFF Under 19 player tan chuan beisei tur awm loh hnuah pawh match tin hi an hmalam hun hriltu a ni.