Pathianni zan dar 8:30-ah FA Community Shield Leicester City vs Man United
Premier League ṭan nan kar khat chiah a awm tawh a, Pathianni zan dar 8:30-a Leicester City leh Manchester United ten FA Community Shield an inchuh tur hi a khuh hawnnaah a ngaih theih ang.
Pawisa thapna lamah Leicester City-in Premier League an champion theih an ring lo a, odds atan an dah zat pawh 5000/1 a ni hial. Claudio Ranieri hoten thilmak tawpkhawk thlentirin Premier League nomawi an chawi a, Community Shield pawh hi an khelh takah chuan champion leh ngei an tum dawn.
Manchester United lamin season liam taa Foxes thlen chin hi an awt a, FA Cup champion ni mah se coach Louis van Gaal an ban. Champions League an khelh dawn loh vangin Jose Mourinho-a'n United a enkawl theih phah a, Community Shield-ah a club thar a kaihruai nghal thei bawk. Portuguese manager tan Barcelona-a a pu hlui Van Gaal-a hi a hlu a ni.
Foxes an ṭang
Leicester City-in Premier League nomawi an chawi theih-na kawnga player pawimawh N'Golo Kante chu Chelsea lakah chan mah se nipui bazar-ah Poland winger Bartosz Kapustka (£7.5m), defender Luis Hernandez (free), French midfielder Nampalys Mendy (free), striker Ahmed Musa (£15m) leh German keeper Ron-Robert Zieler (£2.6m) te an lalut tawh a, tih mai mai an tum lo.
Foxes player thar zingah Ahmed Musa a langsar a, Lei-cester chanchina an player manto ber hian Barcelona nen pre-season friendly match an khelh ṭumin goal hnih a khung a, a goal hmasa zawk phei chu 'solo goal' a ni. Nigeria international hi pound maktaduai 30-a United zawmtu defender Eric Bailly-te hoin an dang theih ang em? tih hi hmuh chakawm chu a ni.
Mourinho hnuaia United
Portuguese manager-in Manchester United a enkawl hnua a player lakluh hmasa ber chu Villarreal defender Eric Bailly-a ni a, hming langsar a ni lo. Mahse, Bailly a lakluh hnuah sum sen ngai lovin Zlatan Ibrahimovic a lalut a, Swedish striker hian Galatasaray nen an inhmachhawn ṭumin goal ropui a khung nghal - United ṭantu tan chuan awm ti nuam ti veng veng thei khawpa 'class' a ni.
Borussia Dortmund winger hlui Henrikh Mkhitaryan thiam zia sawi tam ngai loa kan hriat sa a ni. Pound maktaduai 26-a United zawmtu Mkhitaryan hian season hmasa khan Dort-mund tan inelna hrang hrangah match 51 inlanin goal 23 a khung a, Foxes tlarhnung tan Zlatan leh Mkhitaryan ngaihtuah kawp ngai hi hna hautak a tling ang.
Thawnthu hlui
Team pahnih hi vawi 84 an lo inhmachhawn tawh a, Manchester United an chungnung zawk. United-in vawi 40 hnehna changin vawi 22 an inhnehtawk a, Foxes hian vawi 22 vek hnehna an chang bawk. Team pahnih lo inhmachhawn tawh
ṭhinnaah Manchester United chu team lian zawka dah sa an ni
ṭhin a, zaninah erawh engkim a danglam tawh dawn.
Manchester United hma-chhawn tur hi hmana Leicester kha ni loin Premier League champion an ni tawh a, United hi Champions League pawh khel phak lo club an ni thung - thawnthu hluiin awmzia a nei thui lo ang. Hei erawh hriat reng a ṭha, United enkawltu hi Louis Van Gaal a ni tawh lo a, Jose Mourinho a ni tawh tih hi.
Mourinho leh Community Shield
Jose Mourinho-a'n FA Community Shield inchuhnaah Chelsea vawi li a enkawl tawh a, friendly match aia sang hret inelna chauh niin lang mah se Portuguese manager tan chuan a hmalam hun hriltu pawimawh tak niin a lang lawi si.
2005 - Arsenal 1-2 Chelsea : Didier Drogba goal hnih hmangin Chelsea an chak a, Jose Mourinho chuan, "Chak hi chu a nuam a, amaherawhchu tun inelna hian Premier League a nghawng lo," tiin a sawi. Nghawng erawh a nei niin a lang, an match hmasa pakuaah Chelsea hi an chak vek a, match hnih khelh hmabak a la awmin an champion.
2006 - Liverpool 2-1 Chelsea : Manto taka lakluh Andriy Shevchenko-a'n goal a khung a, hnehna changtu erawh Reds an ni. Inkhelh banah Mourinho leh Rafa Benitez te an in chibai lo. Mourinho chuan, "Ka lan danah chuan ka fel hmel loh tih ka hria, ka duh rum hmel inti a ni thei e. Mahse ka hmel vang hian ka sual tihna a ni kher lo," tiin a in sawifiah. Hemi ṭum hian Blues-in an match hmasa berah Middlesbrough an hneh lo a, an champion zui thei ta lo.
2007 - Man Utd 1-1 Chelsea (Penalty-ah Man Utd 3-0 in an chak) : United tana Ryan Giggs-a goal chu Florent Malouda hmangin Chelsea-in an sut a, penalty shootout-ah Blues player pathumin an pet goal lo vek. Mourinho chuan, "Inrinniah Premier League ṭan a ni dawn a, tun inkhelah kha chuan a chak lo zawkah pawh kan ṭan loh kha," tiin pawi tih loh hmel takin a sawi. Premier League ṭan niah Birmingham an hneh hram a, match ngaah vawi khat chiah chakin field pawn lam buaina vangin September thlaah Chelsea a chhuahsan.
2015 - Arsenal 1-0 Chelsea : Nikum khan Alex Oxlade-Chamberlain goal hmangin Arsenal-in Blues an hneh a, Arsene Wenger-a hoten Mourinho kaihhruai an hneh vawi khatna a ni. Inkhelh banah coach pahnih an in chibai lo a, Mourinho chuan, "Tlarhma kan la hriam tawk lo ang tih kha chu ka ngaihruat dan sa a ni a, kalphung panngai a ni," a ti. Amaherawhchu league match hmasa pangaah vawi thum an chak lo a, champion chu sawi loh tla thei dinhmun aṭanga point khat chauha an him avangin December thlaah ban a ni.
Mourinho hian Community Shield-ah sulhnu ṭha a nei lo a, United ṭantute tana hlauhthawn tur zawk erawh an chak loh apianga nghawng ṭha lo tak a nei zel hi a ni.