Neymar khelhna Brazil chak zo lo

Barcelona forward Neymar chuan Rio Olympic-a an match hmasa berah Brazil hnehna a chanpui zo lo. Summer Olympic thlengtu Brazil leh South Africa te hi goal awm loin an inhnehtawk. Ningani zan Group A inkhel dangah Iraq leh Denmark te inhmachhawnin goal a lut lo bawk.

Mane Garrincha Stadium-a inkhelah Brazil coach Rogerio Micale chuan Neymar bakah tunlai rawlthar langsar Gabriel Barbosa leh Manchester City player thar Gabriel Jesus te chu tlarhmaah a inkawp tir.

Inkhel ṭantir lamah South Africa an hlauhawm zawk a, striker Lebo Mothiba chuan a hun ṭha neih vawi hnih a chhawr ṭangkai thei lo. Minute 60-naah South Africa midfielder Mothobi Mvala chu yellow card vawi hnih hmuh vanga hnawh-chhuah niin Brazil goal nawr turin chakna an nei tawh lo.

Neymar-a'n a ball thiamzia lantirin South Africa tlarhnung chhaih buai ṭhin mah se goal zawnah a pet thei lo a, Pep Guardiola player thar Jesus chuan goal ban pet perin striker Barbosa ball pet chu ṭum hnih ngawt keeper Itumeleng Khune-a'n ṭha takin a dan sak bawk.

Group A inkhel dangah 2015 European Under-21 Cham-pionship semifinalist Denmark chuan Iraq lakah goal an khung theih loh avangin point khatah an lungawi a ṭul ve bawk. He inkhela goal khung theihna hun ṭha ber tia sawi ngam neitu zawk chu Iraq lam an ni a, midfielder Saad Abdul-Amir ball pet ṭha tak chu keeper Jeppe Hojbjerg-a'n a lo dan sak hram.

Inkhel dang

2012 Olympic champion Mexico chuan Group C-a an match hmasa berah Germany chu 2-2 in an inhnehtawkpui. Mexico hian Oribe Peralta goal hmangin hma hruai hmasa mah se Germany tan Arsenal mid-fielder Serge Gnarby-a'n a sut.

Second half-ah pawh Mexi-co lam bawkin goal an khung hmasa leh, midfielder Rodolfo Pizarro chuan an ram goal hnihna khung leh mah se 2014 World Cup squad-a lo tel ve tawh Matthias Ginter-a tauh luh hmangin Germany-in an siphurh an sut nawn a, point khat ve ve an hmu.

Euro 2016 champion Por-tugal chuan rawlthar an neih ṭhat zia an pholang. Group D inkhelah Portugal hian FIFA ranking-a pakhatna Argentina chu Porto striker Goncalo Paciencia leh Geronimo Rulli te goal khung hmangin 2-0 in an hneh - an goal pahnih hi midfielder Bruno Fernandes siamsak ve ve a ni.

Asia aṭanga team ṭha South Korea chuan an match hmasa berah Fiji lakah zahngaihna an lantir lo a, 8-0 in hnehna an chang. Korea hian second half-ah second 90 chhung chauhin goal thum an khung thei.

Inelna neih ṭan a nih hma darkar ruk chauhah Nigeria hian Brazil thleng mah se goal nga an khung thei nghal tho a, striker Oghenekaro Etebo chuan goal li khungin Japan lakah 5-4 in hnehna an chang ve bawk.