Super Cup khel lo tur Bale leh Kroos

Real Madrid duo Gareth Bale leh Toni Kroos te chu karleh Thawhleh zana Sevilla nen UEFA Super Cup an khelh hunah an inlan theih a beisei awm loh.

Euro 2016 final zana inhliam Cristiano Ronaldo chu a la inkhel thei dawn lo chiang a, Wales thiampuipa Bale, Germany international Kroos leh Portugal defender Pepe te chu Euro an khelh avangin chawlh pek rei bik an ni a - Sevilla hmachhawn tura thlan chhuah zingah an tel a beisei awm loh a ni.

Real boss Zinedine Zidane chuan, "Bale, Kroos leh Pepe te hian team training an la zawm lo a, Sevilla hmachhawn tur chuan an inpeih hman ka ring lo. Madrid-a an lo kir hunah an dinhmun enfiah a ni chauh ang," tiin a sawi.

Striker Karim Benzema chu khelmual pawn lama a buaina vangin France aiawh tura koh a nih loh bakah a khêl na vangin enkawl a ngai, mah se tun dinhmunah Benzema hian training a zawm leh tawh thung.

Zidane chuan, "Karim hian kan zingah training a nei tawh a, boruak dang leh harsatna te nei tawh mah se tunah chuan kan bula a awm leh tawh bakah a thawhrim avangin Super Cup-ah a inlan theih ka beisei," a ti.