Pressure-in min ti buai ve lo - Lampard

Nipui transfer-ah Chelsea an bazar nasa a, hei vang hian coach Frank Lampard-a tan pressure-a na sawt dawn nia sawi thawm a ri ring hle - mahse, Lampard chuan pressure-in a tihbuai ve loh thu a sawi!

Chelsea hian pound maktaduai 72 man Kai Havertz, Timo Werner (£48m), Ben Chilwell (£45m), Hakim Ziyech (£36m), Thiago Silva (free transfer) leh Malang Sarr (free transfer) an lalut a, beiseina a sang dawn tih chu thil lang chiang a ni. .

Mahse, Lampard chuan, "Top four beisei a, academy player chher lian tur ringawtin he hmunah hian ka lokal lo. He hmunah hian hnehna chang turin ka lokal a ni. Season hmasaah player kan lalut thei lo a, tun season-ah erawh lalut turin club-in thutlukna a siam.

"Thil a danglam tawh a, hnathawk turin kan inpeih tawh a ni," a ti a, Premier League-ah champion tura inbuatsaih an nih thu a sawi - zanin dar 12:45-ah Brighton & Hove Albion chu tun season-a an match hmasa ber atan an hmachhawn ang. 

Lampard chuan sawi zawmin, "Thil lian tham engmah tiam ka tum lo. Nikumah kha chuan Champions League khelh phak chuan kan lawm a, kan hnathawh turah kan chiang tlangin kan inthurual em em. 

"Season hmasa khan pressure ka nei loah inngai a nih chuan a mak ka ti khawp ang. Pressure chu nuam ti takin ka hmachhawn ṭhin," a ti a, a inringtawk hle. 

Chelsea hian transfer bazar-ah duhtawk mai an la tum lo. Lampard hnuaia tla tlum lo goalkeeper Kepa Arrizabalaga aia ding turin French club Rennes goalkeeper Edouard Mendy an dawr mek a, an chingfel thuai tura beisei a ni. 

Hetihlai hian zanin inkhel turah Ziyech leh Chilwell chu an inhliam avangin an inlan a rinawm loh a, Champions League final khel Thiago Silva-a'n chawlh a lak rei avangin club training a la zawm lo bawk. 

FA Cup final-a inhliam Christian Pulisic leh Cesar Azpilicueta-ten ngai an awh leh tawh avangin zaninah an inlan theih a rinawm a, Brighton tan chuan Chelsea hneh a harsa ang. 

Hetihlai hian Brigh-ton hian player langsar tia chhal theih zingah Adam Lallana chu Liverpool aṭangin free transfer-in an lalut a, English midfielder hi zaninah inkhel bul a ṭan a nih chuan December 2019 hnua Premier League-a inkhel bul a ṭan leh hmasak ber a ni dawn a ni.