Khelmual tharah West Ham an chak nghal

Europa League khelh tum West Ham-in an khelmual thar London stadium an luah hnua an match hmasa berah hnehna an chang nghal - Ningani zan khan NK Domzale chu 3-0 in an hneh a, Europa League playoff khel turin an inpet kai.

Team pahnih inhmachhawn hmasak ṭumin West Ham hi 2-1 in khualmualah an tlawm a, an match hnihnaah erawh midfielder Cheikhou Kouyate-a'n goal hnih a khung hnuah player thar Sofiane Feghouli-a'n goal khat dang a khung ve leh a, inkhel pahnih belhkhawmah 4-2 in hnehna an chang ta zawk a ni.

Khelmual thar

West Ham-in kum 112 chhung an khelmual atana Upton Park an hman hnuah an chhuahsan a, Olympic Stadium tih ni ṭhin, London Stadium tih hming pua an phuah tak stadium-ah an insuan lut.

Kum 2012 London Olym-pic-a athletics inelna atana an hman stadium an luah thar hnuah Hammers fan-te an phur a, Ningani zan inkhel entu zat ringawt pawh hi mi 53,914 an ni!

Stadium tharah player-te an luh rualin fan-ten zai chungin an lo lawm a, inkhelh chhung zawngin fan lam boruak a
ṭha. Hammers boss Bilic chuan, "Hetiang khawp hian kan inkhel boruak a pui hi ka ring lo. Kan stadium thara kan inkhelh hmasak ber a ni a, ka beisei aiin fan-te khan min ṭawiawm ṭha a ni," tiin a lawm hle.

Bilic thukhawchang

West Ham manager Slaven Bilic chuan, "Rilru zawng zawng nena inpeih a harsa a, mah se kan khel ṭha em em a ni. Kan in fit a, kan huaisen a, football hmuh-nawm tak kan khel a ni," tiin a naute khelh danah a lawm hle.

Croatian manager rorum chuan sawi chhunzawmin, "Goal tam zawk khung thei kan ni a, kan khelh dan pumpui thlir erawh chuan a lawmawm hle. First leg-ah kan khel chhia a, mah se khati khawp khan kan insiamṭha hman a ni," tiin ngai an awh leh tawh thu a sawi.