Schweini vanga sawisel tawk Mourinho

Khawvela footballer intel^-khawm pawl FIFPRO member leh dan hremi ni bawk Dejan Stefanovic chuan Manchester United manager thar Jose Mourinho chu Bastian Schweinsteiger a enkawl dan avangin tan-in a khung tlak a nih thu a sawi!

Kum 32-a upa midfielder hian nikum nipui transfer bazar-ah khan Manchester United hi kum thum cham turin a zawm a, mah se Mourinho-a'n United a enkawl hnuah a ruahmannaa a tel loh thu hrilh niin U-23 zingah training neih tir a ni.

Slovenia FIFPRO member Dejan Stefanovic chuan, "Hei hi inzah lohna leh inhmuhsitna lian tak a ni. Slovenia-ah chuan hetianga inhnuaichhiahna a awm a nih chuan court-ah kan kal ang a, Mourinho hian lung inah kum thum tal hun a hman a ngai ang," a ti.

Slovenian Footballers and Sportsmen Union president ni bawk Stefanovic chuan, "Schweinsteiger hi Professional Footballers' Association hnenah zualko se, Mourinho lakah hian thubuai thehlut se ka ti hle. First team player chuan a ṭhiante bulah hun pangngaiah, hmun pangngaiah, coach ṭawiawmna hnuaiah training a nei tur a ni," tiin Germany captain hlui enkawl a nih danah a lungawi thei lo.

Bayern Munich legend Schweini hi Manchester United-in Galatasaray nen friendly match an khelh ṭum khan squad member 25 zingah telh a ni tawh lo a, United captain Wayne Rooney-a testimonial match-a player 22 zingah telh a ni lo bawk.

Hetihlai hian Schwein-steiger-a club hlui Bayern Munich pawh an ngawi mai mai bik lo. German club president Karl-Heinz Rummenigge chuan, "Awih a harsa zawk a ni. Schweini aṭang hian players tam tak chu United ang club zawm tur chuan an inngaihtuah nawn phah fo tawh ang," tiin Manchester United-in an player duh loh an enkawl dan chu a sawisel.

Kum 18 leka upa a nih laia Schweinsteiger-a professional match hmasa ber khelh tirtu Ottmar Hitzfeld pawhin United-in an player an enkawl dan a dem hle. Kum 2003-a Schweini nena Bundesliga nomawi chawitu coach chuan, "Kei chuan hetiang hian player ka enkawl ngai lo a, player ropui tak zah lohna lian tak a ni. Schweinsteiger hi player pawimawh, world champion a ni a, mi rilru ṭha leh huaisen tak a ni bawk. Hetiang mai maia enkawl hi a phu lo," tiin German legend chungchang a sawi.

Manchester United hian Bar-celona keeper hlui Victor Valdes chu Schweinsteiger ang deuh hian Louis Van Gaal-a hnuaiah an lo enkawl tawh a, Dutch coach hian Spanish keeper hi reserve team-a khel tura a hrilh hnuah a khelh duh loh avangin vantlang hriatah a sawisel a, first team training a zawm ve pawh phal a ni lo.