Willian leh Gabriel awmna Arsenal an chak

Premier League 2020-21 season khuhhawnna inkhelah Arsenal chuan Fulham 3-0 in an sawp a, player thar Willian leh Gabriel te chu dang-lamna thlentu an ni. Mikel Arteta nauten kai thar lakah zahngaihna an lantir lo.

Inrinni zan Craven Cottage-a inkhelah Gunners tan Alexandre Lacazette, Gabriel leh Pierre-Emerick Aubamayeng ten goal khat ṭheuh an khung. Winger Willian-a'n an goal hnuhnung pahnih a siamsak, an goal hmasa ber pawh a thawhrah tho a ni.

Defender rinrawl leh tawnhriat nei ṭha David Luiz chu nghawng hliam vangin a inlan thei lo, manager Arteta-a'n William Saliba a khelhtir ngei rin ni mah se insiamrem a la mamawh nia ngaiin squad-ah a telh lo.

Tlarhnungah Rob Holding, Kieran Tierney leh lak thar Gabriel te an intlar a, a sirah Hector Bellerin leh Ainsley Maitland-Niles te an awm thung. Si ban nghak turin Bernd Leno a lo kir leh tawh bawk.

Inkhel tir lamah Gabriel leh keeper Leno te inringthul karah goal an chhuah ṭep a, striker Aboubakar Kamara a che rang tawk lo hlauh. A hnu lamah erawh insiamṭha nghalin Fulham tlarhma tan hmun awl an siamsak nawn tawh lo.

Chelsea tana contract hmang zo Willian-a'n London khawpui chhuahsan si loin a khelhna club a thlak, a beisei ang contract pe duh lotute chil ti put turin khelmual chhungah a thiam thil a 'show' nghal, a freekick chhuih luh tur anga langin ban a per kha lut ni se a hmingṭhatna a zual ang.

Brazil international hian buai nuaih karah goal lamah ball a pet hram a, a ball pet per hi Lacazatte chuan lo nang fuhin hnai tak aṭangin goal khatna an khung. Blues player hluiin corner aṭanga a ball pet chu Gabriel-a'n an goal hnih nan a tauh lut bawk.

Arteta-a'n tlarhnung player-te ball sem turin a hmang ṭhin a, counter attack an hmang ṭangkai ṭhin bawk. Fulham tih sual an vuak letna lamah Willian hian ball la fuhin mual sira awm Auba tan a pe, Gabon international hian ball naran nia ngaih chu goal thumna atan a chantir.

Arsenal manager Arteta chuan, "Season hmasa kan hmang rei a, tun season atan inbuatsaihna kan nei tlem hle. Zirtawpni khan a vawi khat nan a huhoa training kim kan nei ve thei chauh, chutiang chung chuan ṭha taka kan khelh theih avangin ka lawm.

"Gabriel khan thla ruk hnuaah match pangngai a khel leh chauh, Willian erawh Premier League hrechiang sa a nih avangin a thil tih kha chu a mak hran lo," tiin a naute khelh danah a lungawi a, a bik takin a player thar pahnih a fak.

Gunners hian season hmasa khan Chelsea hnehin FA Cup an chawi, season bul ṭan nan Liverpool hnehin Community Shield an la bawk. An buaina ber ṭhin nia lang, tlarhnung pawp an thawmphui chhoh mek avangin beiseina an nei sang.

August 4 khan Fulham hian Championship playoff-ah Brentford hnehin Premier League khel tur hian an tling. Playoff an khelh ṭuma player 11 zinga 10 chuan Arsenal hi an hmachhawn chhunzawm, manager Scott Parker-a'n a player thar zingah chhawr a nei lo.

Season hmasa league goal 26 khungtu Aleksandar Mitrovic chu bench-ah dah a ni a, Serbian international striker hi hun tawp hma minute 27-naah dah luh a ni, a tharum hmangin Arsenal tlarhnung nawr mah se awmzia a nei thui phak lo a ni.

Fulham hi EPL an khelh hnuhnung pahnih 2013-14 leh 2018-19 khan an tla leh nghal a, heng season pahnihah hian goal chhuah hnem ber an ni. Kuminah season bul an ṭan fuh lo leh nghal, manager Parker-a'n inhamtanpui a tum a nih chuan thapui an thawh a 

ngai dawn.