Newcastle chakna mi thar pahnih

Premier League club Newcastle United-in neitu thar neih an tumna a tlawlh tak avangin fan-te ngui mah se season ṭanna inkhelah hlimna tur an nei nghal a, an mikhualna ramah West Ham chu 2-0 in 

an hneh. 

Magpies tan nipui transfer-a an lakluh Callum Wilson leh Jeff Hendrick-ten goal an khung nghal a, Magpies boss Steve Bruce tan chuan a player thar pahnihin goal an khung nghal lai hmuh hi thil nuam tak a ni ngei ang. 

Season tawp lama Premier League-a inhamtang hram West Ham tan erawh mahni muala Magpies ngam loh nghal hi result duhawm lo tak a tling a, nipui transfer-a loan-a an hawh sa Tomas Soucek an la nghet tih bak player thar nei lo team hi fan-ten bazar turin an nawr na leh sawt dawn. 

Premier League inkhel dangah Crystal Palace chuan Southampton chu 1-0 in an lo hneh a, Palace goal awmchhun hi Selhurst Park-a nghet lo nia sawi Wilfried Zaha khung a ni. 

Magpies-in transfer bazar-ah Chheries striker chhuanvawr Wilson, Burnley midfielder Jeff Hendrick, Liverpool-in an dawr hman Norwich City left back Jamal Lewis leh free agent Ryan Fraser-te an lalut a, coach Steve Bruce chuan club neitu Mike Ashley chungah lawmthu a lo sawi tawh. 

West Ham an lenchilh zanah hian Wilson, Lewis leh Hendrick ten bul an ṭan nghal vek a, an khel ṭha em em vek bawk. Wilson hian minute 56-naah goal hmahruai a khung a, hun tawp nan minute thum a la awm tihin Hendrick chuan a khung belh bawk - Hendrick hian assist a nei tel. 

Kum 28 mi Wilson hian Premier League-ah match 126 khel tawhin goal 41-a khung tawh a, assist vawi 16 a nei bawk - Aston Villa-in lakluh duh ve mah se Magpies a thlang zawk a, Steve Bruce tan lawmna a ni. 

Hammers laka an inkhel enin tlarhmaa Andy Carroll nena an inkawp chu hmuhnawm a tling a, hliamin a tibuai loa striker pahnih hi an inkawp reng thei a nih chuan season hmasa Premier League-a goal khung tlem palina Magpies tan chanchinṭha a ni ang. 

West Ham boss David Moyes chuan, "Squad tih chhah hi chu kan duh reng a, kan bazar loh vanga tlawm erawh kan ni lo - chu chu kan zirchian a ngai a ni. Pre-season ṭha tak kan hmang a, duhawm takin season kan khar bawk a, zanin kan khelh dan hi chu a lawmawm loh a ni. 

"Kan player neih sa te nen hei aia ṭha zawk kan nih a ngai a, chu chu kan thei tih ka hre bawk a ni," a ti a, transfer bazar-a player lei lam a la sawi rih chuang lo - Hammers fan-te tan thu hriat nuam a ni lo ang. 

Newcastle manager Steve Bruce chuan, "Kar duhawm ber tiin ka sawi dawn lo. Mahse, Premier League-ah player thar pahnih goal khung hmanga 2-0 a kan chak a nih chuan chutianga sawi pawh chu thil awm tak a ni tho," a ti. 

Bruce chuan hliamin a tihbuai avanga beisei ang ni phak ta lo, mahse Hammers laka khel ṭha em em Carroll chu fakin, "A lo kir leh hnua Andy Carroll ka hmuh ṭhat ber ṭum a ni. Pre-season-ah pawh goal a khung nual a, a dam ṭhata khatianga a khel reng thei a nih chuan a theihna chu kan hria a ni," tiin British player manto ber pawh lo ni tawh striker chungchang a sawi. 

Crystal Palace-in an mikhual Southampton lakah minute 13-na lekah goal an lo khung a, 1-0 in an chak zui. Inkhela goal awmchhun hi vengtu nei lo Wilfried Zaha-a'n Andros Townsend cross ṭha tak aṭanga a khung a ni. 

Saints tan Nathan Redmond chuan chance duhawm tak a hlah a, Palace keeper Vicente Guaita chuan Che Adams leh season hmasaa goal 22 khungtu Danny Ings-te chance neih ṭhat chu ṭha zetin a dansak bawk. 

Southampton defender Kyle Walker-Peters chu red card pek ni zet mah se referee Jonathan Moss-a'n khelmual sira monitor hmanga a ennawn hnuin yellow card a pe a, official-te hi goal, red card leh penalty chungchanga thutlukna an siam dawnin video assistant referee ringawta innghat loa monitor hmang ṭangkai turin hrilh an ni. 

Palace hian defender pawimawh Mamadou Sakho, Patrick van Aanholt leh Gary Cahill-te hliam vangin chhawr thei lo mah se Scott Dann leh Cheikhou Kouyate-ten an awm loh hlanin tlarhnungah an hna ṭha takin an thawk a, a tawpah team ṭha Saints hnehin point thum an hlawh chhuak.