Dr Lalzarmawia (L) hnenah FIFA Sports Management Zirna hlawhtlinna hlan

Mizo zinga sports medicine doctor hmasa ber Dr. Lalzarmawia Khiangte (Mapuia) chuan, FIFA, CIES (International Centre for Sports Studies) leh Pillai Institute of Management Studies and Research buatsaih, Executive Programme in Sports Management a zo a, amaherawhchu Mapuia hi August 7, Zirtawpni khan lungphu chawl avangin a thi a, a hlawhtlinna hi a hre hman ta lo.

Navi, Mumbai-ah Executive Programme in Sports Management hi kum 2018 aṭang khan neih ṭan a ni a, Dr Mapuia pawh hi ṭum nga a zuk kal.

 Covid-19 vangin Graduation Ceremony hi online hmangin September 12, Inrinni khan neih a ni a. Programme buatsaihtu FIFA leh AIFF aiawhte chuan FIFA, PILLAI leh CIES chuan Graduation Ceremony-ah hian Dr Mapuia boral thu, pawi an tih thu leh an ui thu an sawi lang. 

Dr Mapuia hian Mizoram State Sports Council-ah sports medicine doctor hna a thawk ṭhin a. Mizoram Football Association leh Mizoram Boxing Association-ah executive committee member a ni a, Mizoram sports tan a tha a thawhhlawk hle. Tun ṭuma diploma course a zawh hma hian FIFA diploma course dang Football Medicine a zo tawh a, Mizo zingaa awm chhun a ni. 

India-in a vawi khat nan FIFA Under 17 World  Cup 2017-a thlen khan FIFA medical team-ah a tel a, World Cup-a a hnathawh  ṭhat avang hian FIFA aṭangin chawimawina a dawng bawk.