Wales-in Euro 2016 kawng an zawh zel

Zirtawpni zanah Wales-in Gareth Bale-a goal hmangin Eu­ropean Championship 2016 qualifier-ah Belgium an hneh a, Group B hmahruaitu an ni.

Wales hian 1958 FIFA World Cup hnuah inelna lian an la hmachhawn leh lo a, Manchester United legend Ryan Giggs-a'n World Cup emaw Euro Championship emaw khel loin inkhelh a chawlhsan. Bale-a kaihhruaina hnuaiah Wales ram hmabak a eng ṭha hle.

Cardiff City Stadium-ah khawvel player manto ber Bale-a'n minute 25-naah Belgium midfielder Radja Nainggolan tihsual hmang

ṭangkaiin goal pawimawh a khung a, he zan duhawm hi ram tana vawi 50 a khelhna chiah a ni bawk.

Group B hmahruaitu thar Wales hi FIFA ranking number 2 Belgium aiin point thumin an sang a, match li khelh hmabak awm mah se Euro 2016 khel turin an dinhmun a ṭha hle.

Belgium tan Pre­mier League player of the year Eden Hazard, Wolfsburg midfielder Kevin De Bruyne, Aston Villa striker Christian Benteke leh Roma midfielder Nainggolan ten chance ṭha an hlah.

Marc Wilmots hoten 2014 FIFA World Cup hnua an chak lohna hmasa ber an tawng. Wales tan Bale a langsar fal deuh a, Arsenal midfielder Aaron Ramsey leh Liverpool midfielder Joe Allen an kawl tel tih hriat a ṭha bawk.

Wales chakna goal khungtu Bale chuan, "Mi zawng zawngin inelna liana Wales thlenpui ka duh zia chu an hria. Euro 2016 khel ngei turin theihtawp kan chhuah zel dawn," tiin a sawi.

Real Madrid forward Bale chuan sawi zelin, "Ka tan chuan zan duhawm bik a ni. Ram tana vawi 50 ka khelh avangin ka chhungte leh ka ṭhiante an pungkhawm a, ka tana pawimawh ber chu kan chak hi a ni. Fans ṭha tak kan nei a, ka career-ah khatiang anga ṭawiawmna ṭha kha ka la hmu lo," tiin mipui a fak hle.

Stadium khat tlata inkhel entu zingah Real Madrid manager thar Rafael Benitez a tel a, Bale hi season tharah Real player pawimawh a ni chhunzawm zel dawn tih chiang.

Wales hian ran­king-a pahnihna Belgium an hneh avangin thla thara FIFA ranking chhuak turah a vawi khatna atan top 10-ah an awm thei dawn. Hei vang hian July thlaa 2018 World Cup qualifying draw-ah seeded an ni thei ang.

Wales manager Chris Coleman chuan, "World Cup qualifying draw neih turah point 1-ah kan awm thei dawn a, kan tan chuan a hlu hle a ni," tiin ranking-a hma an sawn tur chungchang a sawi.

Coleman chuan an hmabak sawi zuiin, "Match li khelh tur a la awm a, point 12 hmuh theih tur ala awm. Ranking lama kan awm zel dan chu chhiarkawp thiam tawh phawt chuan an chhut thei a, keini tih tur chu kan hmabaka theihtawp chhuah a ni," a ti.

Group B inkhel dangah Israel-in Bosnia Herzegovina 1-0 in hneh a, Cyprus-in Andorra 3-1 in an hneh ve bawk.