New York Diamond League-ah Bolt a inlar

Inrinni khan Jamai­can sprinter Usain Bolt chuan New York Dia­mond League-a 200m in­tlan­siakah hnehna a chang.

100m leh 200m intlansiak World record siam tu Bolt hian New York a Adidas Grand Prix-ah second 20.29 chhungin 200m a tlan thleng a, a hnungah hian kum kum 19-a upaZharnel Hughes a thleng thung.

Kum 2009 khan Berlin-a World Cham­pionship neihah Bolt hian 100m chu second 9.58 chhunga tlan thlengin World record a siam bakah 200m chu second 19.19 chhunga tlan thlengin record a lo siam tawh bawk. He a record hi tun dinhmunah chuan a pha rih lo.

Kuminah American sprinter Justin Gatlin a rawn lang sar hle a, Gatlin hian thla hmasa khan Eugene Diamond League-ah 100m chu second 9.74 chhunga a tlan thlen bakah 200m chu second 19.68 chhunghin a thleng bawk. August thla a Beijing World Cham­pionship neih tur a mipui mit fukna tur ber chu Bolt leh Gatlin hi an ni ang.

August thla a Beijing World Championship neih tur chungchang sawi langin kum 28-a upa Bolt chuan, "Vawiin a ka result-ah hian ka lawm viau. Mahse ka la duh tawk lo, hei aia ṭha a tlan thei ka ni tih ka hria. Tunhnai ka result leh Gatlin result an khaikhin in Beijing-ah hian ka chak lo turah mi tam takin an ngai tih ka hria. Hei vang hian ka buai pha lo a, ka theih tawpin Beihinga intlansiak hmachhawn turin ka in puahchhah zel dawn," tiin a sawi.

New York Diamond League-a mipa intlansiak dangah American Tyson Gay chuan second 10.12 chhunga 100m tlan thlengin hnehna a chang bawk. Gay-a hnungah hian Keston Bledman leh Nesta Carter an thleng ve bawk.