MBBA Season Opening MSL club zingah Chawnpui VR4
Mizoram Basketball Association hnuaia Division I club Chawnpui VR4-in Mizoram Super League club Tuikual South hnehin MBBA Season Opening Tournament semifinal an lut.
Thawhlehni khian Hawla Indoor Stadium, Republic Vengthlangah semifinal khelh a ni dawn. Tlai dar 5:00-ah VR4 leh Zarkawt BCA an inkhel ang a; zan dar 7:00-ah Mission Veng Vikings leh MSL champion Khatla TBL te an inhmachhawn bawk ang.
Chawnpui VR4 76-61 Tuikual South
Inrinni khan Hawla Indoor Stadium-ah quarterfinal khelh a ni a, match hmasa berah upset awm nghalin Tuikual South-in 61-76 in VR4 an hneh lo. Team pahnih hi MSL Playoff final-ah an intawng a, Chawnpui VR4 chetsual hmang ṭangkaiin Tuikual South captain F. Zodinthara ball pass chu state pawn player pasang Rakesh-a'n a dunk a, MSL khel turin an tling. Playoff final zawha an intum hmasak berah Chawnpui VR4-in phuba an la.
Tuikual South-in MSL Playoff-a an player pawimawh Chp-a, Rakesh, DV-a, Ravi leh Faka te bakah coach/player KC-a an chhawr thei lo. Tuikual captain Dina'n point 19 zet hlawhchhuak mah se team tan chakna tham a tling lo a, Chawnpui VR4 tana point 20 score-tu Lalnunmawia'n MSL club lakah Division I club a chak pui.
Mission Veng Vikings 64-55 Chaltlang Ryders
Chaltlang Ryders-in MSL-a point 219 score-tu Mapuia Zote an chhuah tir a, player langsar an lak luh loh an tuar. Tun inelnaa MSL club ve ve intumna hmasa berah Ryders-in Most Defensive Player Moses leh Lalrina Renthlei khelhna Mission Veng Vikings an ngam lo. Vikings guard Lalrina'n point 15 a score a, Vikings 64-55 in an chak.
Zarkawt BCA 91-54 Zarkawt Serpents
Zarkawt Derby-ah Zarkawt BCA an chak. MSL-ah BCA-in anmahni ang bawka Zarkawt club Serpents ṭum hnih an hneh tawh a, season opening-ah result a danglam lo. Perimeter shooter ṭha Henry Lalngaihawma'n BCA tan point 21 a lut a, 91-54 in BCA an chak.
Dawrpui Aces 38-98 Khatla TBL
MSL champion Khatla TBL tan Division I club Dawrpui Aces hneh a harsa lo, quaterfinal match hnuhnung berah Khatla TBL kawng tinrengah an chungnung a. TBL forward Gospel-a'n point 31 a score a, 98-38 in an chak a, tun inelnaa insawpna nasa ber a ni.