Hmeichhe World Cup England an chak, harsatna hnehtu Kirby a vul
Inrinni khan chak ngei ngei mamawh England-in an beisei ang result an hlawhchhuak a, hmeichhe World Cup-ah Mexico chu 2-1 in an hneh.
An World Cup match hmasa berah England-in France an hneh lo a, chak ngei an mamawh. An mamawh chhanna chu kum li liamtaa rilru lam buai vanga football chawlhsantu Fran Kirby a ni. Kum 21-a upa striker hian a nu boral a tuar luat vangin football a lo chawlhsan tawh a, mahse Inrini-a inkhelah erawh England goal hmahruai khungtu a ni.
Minute 70 naa Kirby goal khung hi England tan minute 82 naah Karen Carney chuan a chhunzawm ve leh a, 2-0 a ni. Mexico tan minute 90 naah Fabiola Ibarra chuan rawn khung ve leh mah se awmzia a nei thui tawh lo a, England-in 2-1 in Mexico an hneh.
France an chak lo
An macth khelh hmasak berah England hneh mah se a vawi hnihnaah erawh France team-in beisei ang result an hlawhchhuak zo lo a, Colombia lakah 0-2 in an tlawm.
Colombia tan Lady Andrade leh Usme Pineda te'n goal an khung a, 2-0 in an ram hnehna an chanpui.
South American team Colombia an chak laiin Brazil-in chak lo nih bik an duh lo a, minute 44 naah Andressa Alves goal thun hmangin an khingpui Spain chu 1-0 in an hneh.
USA-in inkhel thunun viau mah se Swedish goalkeeper Hedvig Lindahl chet ṭhat zan an nang hlauh a, an khingpui Sweden lakah goal an khung thei lo. Team pahnihin goal khung an harsat ve ve avangin inkhel hi goal inpe loin an ṭin a ni.
Switzerland hmeichhia-in goal an sur tir
Inrinni inkhel ṭhenkhatah goal khung an harsat laiin Switzerland hmeichhe team erawhin goal khung lamah harsatna an tawk lo. An khingpui Ecuador chu 10-1 a sawpin Fabienne Humm chuan hmeichhe world Cup chanchina hat-trick rang ber a siam a, minute 47, 49, 52-ah te goal a khung a ni.
Switzerland tan Ramona Bachmann chuan hat-trick a siam ve bawk. Switzerland leh Ecuador inkhelah hian hat-trick dangdai kan hmu bawk a, Ecuadorian player Angie Ponce chuan an lamah vawi hnih a tih luh mai bakah penalty aṭangin Ecuador goal awmchhun hi a khung ve bawk!
Asian team pawh an chak zel
Hmeichhe World Cup-ah Asia aiawha tel te an chet ṭhat chhunzawm zel. Champion lai Japan chuan Inrinni a inkhelah Aya Sameshima leh Yuika Sugasawa te goal thun chhawr ṭangkaiin 2-1 in Cameroon an hneh.
Asian hmeichhe team dang zingah Australia hmeichhe team tan Kyah Simon chuan goal hnih khungin Australia-in 2-0 in Nigeria an hneh.