Liverpool-ah keeper thar
Nipui transfer-ah Liverpool-in thawm an neih belh zel a, Bolton Wanderers goalkeeper Adam Bogdan chu free transfer-in nimin khan Anfield-a lut turin an inrem pui.
Kum 27-a upa Hungary international hian Bolton-a a contract a hman zawh hun July 1-ah Anfield hi a pan ang. Kum 2007-a Championship club Bolton pantu Bogdan hian Liverpool-in an chhuah zalen tak Australian keeper Brad Jones hmunruak luahin Reds first-choice keeper Simon Mignolet thachhang a dawl tura ngaih a ni.
Bolton tana vawi 120 lai inlan tawh keeper hi kum 2011-12 season chhung khan first-choice keeper a ni a, hemi hnu season hnih erawh inhliam vangin match a khel tam lo thung.
Liverpool-in tun nipui transfer-ah player pathum an lalut der tawh a, nikum nipui transfer-a inseng hnem tak team hian Bogdan hma hian free transfer vekin Burnley striker Danny Ings leh Manchester City midfielder James Milner te an lo lalut tawh bawk a ni.