Wenger hi manager ṭha tak a ni - Mourinho

Chelsea manager Jose Mourin­ho chuan Arsenal manager Arsene wenger chu khawvela manger ṭha berte zing ami a nih thu a sawi.

Tun season-ah London club pahnih hi Premier League cham­pion nih tumin an inbei nasa hle a, mahse hun pawimawha che ṭha ṭhin zawk Chelsea a tawpah an chungnung. Match 38 khelh aṭanga point 87 hmuin an champion a, an elpui Arsenal erawh point 75 hmuin pathumna an ni thung.

Portuguese manger Mourinho chuan French manager Wenger-a chungchang sawiin, "Ka ngaihdan chuan Arsenal hian 'Top manager' an nei a ni. Season tharah chuan anni hi an hlauhawm ang, tun season ai hian an hlauhawm dawn tih hi ka chiang hle. Manager fing leh tawnhriat nei tam an neih bakah player ṭha tak tak an kawl khawm nual a, player thar an lakluh ngei pawh a rinawm chuvangin kan inel leh ngei ang," tiin a sawi.

Mourinho hian season liamta khan Chelsea chu a vawi li nan Premier League champion nomawi a chawi pui a ni.