Deontay Wilder-a'n WBC heavyweight title a humhim
Nimin Pathianni zing khan American boxer rothap Deontay Wilder chuan Mexican American boxer lar Eric Molina chu Alabama khawpuiah inhnek puiin round kua naah a tuk thlu a, WBC heavyweight title a kawl lai chu a humhim.
Boxer lian pahnih inhnek hmuhnawm takah hian Wilder-a'n a kuttum a chhawr ṭangkai thiam zawk a, fourth round an khelh thlen meuh chuan kum 33-a upa boxer Molina hi a tuk thlu der tawh. Mahse, Canadian boxer hian awlsam taka tlawm bik tum loin a tho leh a, fifth round-ah vawi hnih lai kum 29 a upa leh naupang zawk Wilder hian a hnek thlu leh a, a tlawm duh chuang lo. Round kua naa Wilder-a hnek na tak erawh Molina hian a dawl zo tawh ngang lo a, a tlawm zawkah a ṭang ta nge nge a ni.
Molina hian vawi 25 inhnek a hmachhawn tawhah hneh loh vawi hnih a tawng tawh.
Kumin January thlaa kum 2007 hnua American boxer heavyweight title kawl hmasa ber ni tur a Canadian boxer lar Bermane Stiverne hnehtu Wilder hian professional boxing a luhchilh hnuah hneh loh a la tawng lo tluang zel a, vawi 34 a inhnek tawhah a khingpuite a la hneh fai vek a ni. Wilder-a record hi a chhuanawm hrim hrim. Bermane Stiverne nena an inhnek ṭum chiah khan round 12 a khingpuite'n an thleng thei a, a bak chu a knock out fai vek a ni.
Ft 6 leh inch 7 laia sang boxer hian kum 2004 aṭanga chak lo hmel la hmu lo Wladimir Klitschko hmachhawn a duh thu sawi nghalin, an pahnih hian an inhmachhawn thei a nih ngat chuan inhnek ropui tak a nih tur thu a sawi.