Copa America Messi-a'n Argentina chakpui zo lo
Pathianni zing khan Chile rama Estadio La Portada de La Serena-a Copa America Group B inkhelah Argentina leh Paraguay te chu goal hnih ve ve khungin an inhnehtawk.
First half a Sergio Aguero leh Lionel Messi te goal khung chu second half-ah Nelson Valdez leh Substitute Lucas Barrios te goal hmangin Paraguay-in an chhang let.
Kum 2014 FIFA World Cup runners-up Argentina hian rin lawk ang ngeiin inkhel an thunun nghal a, mual dinglam sira awm Javier Pastore a hlauhawm bakah Javier Mascherano leh Lionel Messi te an awm mai mai lo bawk.
Messi siamsak hmangin Aguero-a'n goal khung theihna hun nei mah se goalkeeper Antoy Silva a paltlang zo lo. Mahse, Paraguay defender Miguel Samudio chet sual nang ching zuiin Aguero chuan minute 29-ah an hmahruaina goal a khung.
Paraguay an insiam rem hman lo, wing back Miguel Samudio-a'n Manchester United player Angel Di Maria a tih tluk vangin penalty a chawi. Argentina captain Messi chuan goal-ah chantirin first half tawp thlengin Argentina-in 2-0 in hma an hruai.
Second half-ah pawh Messi bawk kan hmu hmasa leh a, ani hian Pastore ball cross ṭha tak chu a ke dinglam hmain an goal thum nan a khung teuh hle.
Paraguay tan striker Nelson Valdez a rawn lang chhunzawm ve nghal a, Frankfurt player hian minute 60-ah an si phur sut na goal ni turin hla tak aṭangin a pet lut. Argentina goalkeeper Sergio Romero tan dan ngaihna a awm lo.
Hun tawp nan minute 11 chauh a awm tawh tihin Paraguay coach Ramon Diaz chuan striker Roque Santa Cruz lachhuakin a aiah Spartak Moscow striker Lucas Barrios a luh tir a, a tisual lo. Freekick aṭanga ball lo kal Paulo Da Silva tauh pial chu Barrios-a'n minute 90-ah Argentina goal-ah a khung.
Juventus striker Carlos Tevez chuan Di maria cross ball chu tauh goal teuh hle mah se goal sirah a kal hlauh. Goal hnih ve ve neiin inkhel an ṭhin ta a ni.
Manager te thu khawchang
Paraguay coach Ramon Diaz chuan, "First half-ah kha chuan a manganthlak ngei mai, khawvela team ṭha ber te zing ami kan hmachhawn bakah Messi a awm avangin a harsa hle. Mahse, inkhelh chawhnu lamah chuan chak loh pawh huamin kan bei let a, a tawpah kan huaisen rah kan hmu a, ka lawm hle. Argentina laka goal hnih chhuah hnua sut leh theih hi result ṭha tak chu a ni," tiin a sawi.
A naute an inthlahdah a ngaitu Argentina coach Gerardo Martino chuan, "Bul kan ṭah ṭha, mahse Valdez-a'n goal a khung hnu khan harh chhuak tur ka ni. Goal dang khung belh leh turin hun pawh kan nei. Inkhelah rilru kan pek tawh loh vangah ka ngai, kan tihsual lai te kan ennawn anga, kha tiang kha a thleng tawh tur a ni lo," tiin an result-ah a lungawi lo.