Spurs chak zo lo

Tottenham Hotspur-in Premier League season an hmang fuh hleithei lo - Pathianni zan khan Wolverhampton Wanderers nen 2-2 in an inhnehtawk a, Wolves erawhin coach thar Vítor Pereira hnuaia league match thum an khelh aṭangin point sarih an hmu thung.

Wolves hian Hwang Hee-Chan hmanga goal hmahruai khungin, Rodrigo Bentancur chuan Spurs tan si phurh a sut. Hee-Chan nena South Korea tana khel Son Heung-min erawh a vanneih zan a ni lo a, Spurs captain hian penalty a hlah.

Spurs tan Brennan Johnson chuan first half hun pek belhah hmahruaina goal khung zui tho mah se, hun tawp nan minute thum chauh a awm tawh tihah Jorgen Strand Larsen chuan si phurh a sut a, 2-2 in inkhel a tawp.

Ange Postecoglou enkawl Spurs hi league table-ah 11-na an ni mek a, palina Chelsea chu point 11 ngawtin an thlau tawh - season tharah European football khelh a harsa tawh dawn.