La Liga an khel ṭan ve ta

Inrinni zan khan La Liga pawh khelh ṭan a ni ve ta a, club langsar Real Madrid, Barcelona leh Atletico Madrid-te an la inkhelh loh avangin season dang angin ngaihven erawh a hlawh tawk lo niin a lang. 

Eibar leh Celta Vigo inkhelah team pahnihin goal an khung lo a, Eibar defensive midfielder Papakouli Diop chu minute 87-naah hnawhchhuah ni mah se hun a tam tawh loh avangin Celta Vigo tan chhawr hman a ni lo - Eibar goalkeeper Marko Dmitrovic-a che ṭha takzet bawk. 

La Liga inkhel dangah Granada chuan 2-0 in Athletic Bilbao an hneh bawk a, mualneitu Granada tan hian Venezuelan midfielder Yangel Herrera leh Spanish midfielder Luis Milla-te chuan goal khat ve ve an khung. 

Athletic coach Gaizka Garitano-a'n rin loh takin a player langsar Inaki Williams chu bench-ah a dah a, Spanish forward hian a luh hnuah bar tihper mah se a team erawh a chhanhim zo chuang lo. 

Granada hian season hmasaa an match tawp berah khan Athletic hi 4-0 in an lo sawp tawh a, tun season bul ṭannaah 2-0-in an hneh leh ngat.

Osasuna chuan 2-0 in La Liga kai thar Cadiz chu khualmualah an hneh ve bawk a, minute 10-naa Adrian Lopez-a goal hmahruai khung chu Ruben Garcia chuan minute 79-naah a chhunzawm ve leh a ni.