Zaninah Santosh Trophy final

78th National Football Championship for Santosh Trophy 2024-25 final chu zanin dar 7:30 hian GMC Balayogi Athletic Stadium, Hyderabad-ah West Bengal leh Kerala ten an khel dawn. Inkhel hi SSEN app-ah a thlawn vekin a en theih.

India rama football hmanga state leh state inelna sang ber Santosh Trophy-ah West Bengal-in record an nei ṭha ber a, vawi 32 ngawt an champion tawh. Chutihrualin West Bengal hian inelna hnuhnung berah final round an lut pha lo a, kuminah erawh nasa takin an insiamṭha.

Kerala hi vawi sarih champion tawh an ni a, kum 2022 kha an champion hnuhnun ber a ni. Nikum khan final round-ah Mizoram lakah quaterfinal-ah an chak lo a, kuminah erawh final hial an thleng.

West Bengal hian final thleng turin quarterfinal-ah Odisha 3-1 in an hneh a, semifinal-ah champion lai Services 4-2 in an hneh leh bawk. Robi Hansda chuan tun inelnaah goal 11 khung tawhin top scorer a ni mek.

Kerala hian quarterfinal-ah Jammu & Kashmir 1-0 in hneh hram mah se semifinal-ah Manipur 5-1 in an sawp. Coach Biby Thomas Muttath kaihhruai team hian inrintawkna tak an nei dawn a, chutihrualin West Bengal hi coach tawnhriat nei ṭha Sanjoy Sen-a enkawl a ni.