Man United tan relegate a theih - Amorim

31st December, 2024

Manchester United tan khua a var thei lo, Thawhṭanni zan khan Old Trafford-ah Newcastle United 2-0 in an hneh lo. Magpies tan Alexander Isak leh Joelinton ten first half-ah an khung a, Ruben Amorim-a hote tan chhanletna a awm lo.

Man United hian Portuguese manager Amorim hnuaiah beiseina sang tak an nei a, Manchester City an hneh hnuah beiseina an nei sang lehzual. Mahse, United hian Pep Guardiola hote talbuai lai an hneh hnuah hian Tottenham, Bornemouth, Wolve leh Newcastle te an hmachhawn leh tawh a, an chak lo vek. Match hnuhnung pathumah phei chuan goal an khung lo.

Magpies-in bul an ṭan ṭha a, minute lina lekah vei lam aṭanga Lewis Hall cross ball ṭha bik chu Isak-a'n a tauh lut. Goal luh hnuah pawh mikhual team an hlauhawm zawk a, Anthony Gordon leh Joelinton te an nung ṭha hle.

Man United tlarhnung n insiamṭha thei lo a, minute 18-naah inkhel thununtu Mapgies-in goal an khung belh. Vei lam aṭanga Gordon-a cross chu Joelinton-a'n a khung belh.

Goal hnih luh hnuah pawh Newcastle United-in an nawr bet a, Isak-a goal khung chu offside vangin pawm a ni lo. Sandro Tonali pawhin hnai tak aṭangin goal ban a pet per bawk.

Minute 33-na lekah Joshua Zirkzee chu Kobbie Mainoo-a'n a thlak a, United an khel ṭha hret. Mualneitu tana chance ṭha ber chu Rasmus Hojlund-a'n a hlah. Second half-ah Man United an khel ṭha hret a, Harry Maguire-a'n goal ban a tauh per a, goal erawh an khung thei lo.

Newcastle-in chak an phu zawk a, an phu ang ngeiin 3-0 in hnehna an chang. Man United tan erawh khua a var lo hle. Bruno Fernandes-a'n team a uap ṭhat tawk loh avangin sawisel hlawh a, Portuguese midfielder hi a khelh lohin United an buai lehzual. Man United hi table-ah 14-naah an awm mek.

Man United manager Amorim chuan, "Relegate pawh hi thil theih a ni. Kan fan-te bulah thil nihna dik tak kan sawi ngam a ngai," tiin a sawi a, hmabak a êng lo takzet. Amorim-a hote hian Juanuary 5, Pathianni hian Liverpool an tlawh dawn a, Arne Slot-a hoten Anfield-a an hmelma Man United mikhual an châk tawh khawp ang.