Serena a inhnukdawk

US Open an khel zo chiah a, tunkar aṭangin clay court inelna Italian Open khelh chhunzawm leh nghal a ni dawn. Serena Williams chuan a keartui hliam a la dam fel loh avangin Rome khawpuiah a inkhelh loh tur thu a sawi.

American star hian Grand Slam nomawi 24-na beiseiin US Open a khel a, mahse a hlawhtling lo - semifinal paltlang zo loin a zinkawng a tawp. French Open khelh theih a inbeisei a, mahse inbuatsaihna tournament erawh a khel thei dawn ta lo.

Kum 38 mi Serena chuan, "Roma-ah ka inlan thei dawn lo, hliam ka neih avangin min ṭantu tam tak awmna khawpuia ka inlan thei lo tur hi a pawi ka ti. A rang thei ang berin tennis khelh chhunzawm ka duh a, chumi tur chuan tunah hian chawlh ka mamawh," a ti.

Italian Open hi a nihna takah chuan May thlaa khelh tur kha a ni a, coronavirus vangin inelna khelh hun hi an sawn. Inrinni zana US Open hmeichhe singles final kheltu Victoria Azarenka erawh chuan clay court-ah hian inlan chhunzawm a tum.

Nizan khan US Open mipa singles final khelh a ni a, result kan hre hman lo. Nomawi inchuh pahnih Dominic Thiem leh Alexander Zverev te hi Rome-ah an inlan thei dawn lo, semifinalist Daniil Medvedev pawh a inhnukdawk.

Mipa singles lamah champion tura rinkai leh seeded pakhatna ni bawk Rafael Nadal a inlan dawn, Spanish tlangval hian hripui len hnua a vawi khat nan tournament a khel ang - a tan French Open inbuatsaihna a ni nghal ang.

World number 1 Novak Djokovic pawh a inkhel dawn. Serbian star hi US Open-ah khan line judge chu ball a vuak per avangin tih tlak (disqualified) a ni a, tun karah a tihsual siamṭhat theihna hun a nei dawn tihna a ni.