2018 FIFA World Cup Qualifier Constantine leh India-in Guam hmaah fiahna hmachhawn dawn

India-in English coach Stephen Constantine hnuaiah 2018 FIFA World Cup Qua­lifier second round an thleng a, match hmasa bera Oman an hneh loh hnuah vawiin chhun dar 11:30 hian Guam an hmachhawn ang.

2014 AFC Challenge Cup-ah India-in Guam hi 4-0 in an hneh a, hemi ṭum hian Oman lama goal ropui khungtu Sunil Chettri-a'n goal hnih a khung. Amaherawhchu tun ṭumah hian India-in Guam thleng turin darkar 16 lai an hmang a, FIFA ranking-a 174-na Guam hi an muala khelh an awlsam dawn lo.

Player ngai bawk

India starting eleven tur a la chiang lo mah se Con­stantine-a'n starting eleven ngai a hman a rinawm. English coach hian captain erawh a thlak a, defender Arnab Mondal aiah Sunil Chettri chu captain atan a ruat.

Oman an khelh ṭum khan tlar hmaah Sunil Chhetri leh Robin Singh te an inkawp a, midfield laiah Sehnaj Singh leh Eugeneson Lyngdoh te awmin wing-ah Jackichand Singh leh CK Vineeth te an awm. Veilama tlan Benga­luru winger Vineeth hi match hmasa lama khelh ṭhat tawk loh avangin Royal Wahingdoh winger Seitya­sen Singh a lut thei bawk.

Defence lai hi India buaina a ni. Kerala Blaster defender Sandesh Jhingan inhliam vangin defence laiah Arnab Mondal kawppui turin vei lama awm ṭhin Dhanachandra Singh chu enchhin a ni a, Manipur defen­der penalty chawi vangin India-in Oman lakah point an hloh. Chutihrualin bench a ṭhu Gurwinder Singh, Augustin Fernandes leh Reagan Singh te hi English coach-in a ring ngam kher lo ang.

Wing back-ah Mizo tlang­val Lalchhuanmawia leh Rino Anto an awm leh a rinawm. Bengaluru wingback Anto hi Oman laka goal rang taka an chhuahna chhan kha a ni a, a khelh ṭhat zui loh bawk avangin bench-ah a ṭhu a nih pawhin a mak lo ang.

Guam ve thung

Gary White enkawlna hnuaiah Guam-in 4-4-1-1 formation an hmang a, defence ngai pawimawh hmasa berin counter attack chu an innghahna a ni. Turkmenistan an hneh ṭumin pawhin ball chang tlem mah se an goal khat khung an hmang ṭangkai a, point thum an hlawhchhuak tawh.

Guam manager White hian ram pawn aṭangin AJ DeLaGraza, Ryan Guy, John Matkin, Brandon McDonald leh Mason Grimes te a la lut a, heng player-te hi team innghana an ni. India pawhin Guam kalphung ang hi hmang se chuan Europe club tana khel India aiawha khel thei tur an awm ve nual.

Defence laia inkawp Grimes leh DeLaGarza te hi an khawng ṭha a, DeLaGarza hi MLS club LA Galaxy tana khel a ni. Guam player pawimawh tur chu Jason Cunliffe a ni a, Guam attac­king midfielder hian ram tan vawi 35 a khelh tawhah goal 17 a khung.

Jeje Inhliam?

Tuna India squad-a Chhetri tih loa goal khung tam ber Jeje Lalpekhlua a dam chiang lo a, team training-ah pawh warm up bak a zawm lo. Hnahthial tlangval hian inhliam vangin starting eleven-ah hmun nghet a chang tawh lo a, 100% fitness nei lo mah se mamawh dan a zirin hman theih a ni ang.

Jeje chuan, "An ground hi artificial turf a ni a, a ṭhat tawk loh avangin advantage an nei thei ang. Boruak erawh lum ve tho mah se Goa leh Kolkata ang em em a lum chu a ni lo. Ka dam chian loh avangin Mizo mipui ṭawm­­ngṭaina ka mamawh lehzual a, khelhna hun min pek chuan goal khung tumin theihtawp ka chuah ang," tiin Vanglaini palai a hrilh.

India left back Lal­chhuan­­mawia chuan, "I League-ah hi chuan khelh dan hi a inang deuh vek a, chutihrualin AFC Cup kan khelh khan min pui khawp mai. Guam hi an chak tawh a, keini lamin point ka la hmu ve lo. Chak ngei tumin theihtawp kan chhuah ang," tiin chak ngei an tum thu a sawi.

Coach thukhawchang

India coach Constantine chuan, "Artificial turf-ah kan khel dawn a, practice-na hun kan neih ang kan hman ṭangkai a pawimawh hle. Ram danga boruakah kan talbuai loh a ngai a ni. An player engemaw zat hi US club tan an khel a, kan fim­khur a ngai dawn a ni," a ti.

India hi Iran, Guam, Oman leh Turkmenistan te nen Group D-ah an awm.