Mercedes Cup champion Nadal

Pathianni zan khan Rafael Nadal chuan Mercedes Cup final-ah Viktor Troicki hneh­in champion nomawi a chawi. Kum 2010 hnuah grass court-a a champion lehna hmasa ber a ni.

Stuttgart a inkhelah hian spaniard Nadal hian dar­kat khat leh minute 27 chhungin straight set 7-6 (7-3), 6-3 in hneh­na a chang a ni. Kum 2005 leh 2007 khan Nadal hi he hmunah hian a lo champion tawh bawk. Champion Nadal hian pawisa $118,000 a dawng a ni.

Kum 21-a upa Nadal hian final inkhelah hian vawi 11 zet 'ace' siam theiin champion turin harsatna a tawk lem lo. Nadal hian tennis a khelh hun chhungin champion nomawi vawi 66 chawi tawhin heng zinga pali chauh hi grass court-ah a ni thung.

World number 10 Nadal hian June 29 a Wimbledon khelh hmain tunkar hian Queens Cup khelh leh pawt a tum. A match hmasa berah Alexandr Dolgopolov nen an inkhel ang.

Grand Slam vawi 14 champion tawh Nadal chuan, "Hnehna ka chang thei hi ka lawm tak zet, kuminah ka vawi hnih champion na chiah a nih avangin a hlu hle. Ka tan chuan kar duhawm tak a ni chiang. Wimbledon khelh hmain Queens Cup khelh leh ka tum avangin chawl hman ka ni lo a, ka inbuatsaih chhunzawm nghal ang," tiin a sawi.