Euro 2016 Qualifier Goal 3 = Wilshere goal ropui 2 + Rooney goal 1

Pathianni zanah England-in goal thum an khung a, European Cham­pionship 2016 Qualifier vawi ruk an khelh tawhah an la chak vek.

Ljubljana-ah Slovenia-in veteran stri­ker Milivoje Novakovic hmangin first half-ah goal khatin hma an hruai a, second half-ah England midfielder Jack Wilshere-a'n goal ropui vawi hnih a khung.

Slovenia-in Nejc Petnik hmangin sut mah se England an beidawng lo a, captain Wayne Rooney-a'n minute 86-naah chakna goal a khung.

England-in point 18 hlawhchhuakin Group E hmahruaitu an ni a, Lithuania 1-2 a hnehtu Switzerland in an dawt a, Slovenia pathumnaah an awm chhunzawm zel bawk.

Defence pherh

Roy Hodgson-a'n tlar hnungah Gary Cahill leh Chris Smalling te defence laiah a inkawp tir a, right back-ah Nathaniel Clyne aiah Phil Jones dah zawk niin left back-ah Kieran Gibbs a awm.

Minute 37-naa Slovenia goal hmasa ber hi defence pherh vang a ni. Milivoje Novakovic leh Josip Ilicic ten England tlarhnung chiang takin an ṭhiat a, Man City keeper Hart-a'n tih theih a nei lo.

Second half-ah inhliam Jones aiah Liverpool winger Adam Lallana a lut a, inkhel thlak danglamtu a ni.

Goal ropui chu

Minute 57-naah Slovenia tlarhnung an fimkhur tawk lo a, Wilshere goal mawina a nep phah lo. Penalty area pawn chiah yard 23 aṭangin kawh zetin Wilshere-a'n England tana a goal hmasa ber a khung.

Minute 73-naah goal mawi luh hmain pass mawi a awm a; Jordan Henderson, Andros Townsend leh Lallana te an inpek kual hnuah Wilshere-a'n a ke vei lamin nalh zetin goal kilah a khung. Slovenia keeper Samir Handanovic tan dan ngaihna a awm lo.

Arsenal midfielder hian England tan vawi 28 a khel tawh a, goal hnih a khungna chauh a ni.

Hun tawp boruak

England-in awlsam takin chak an tum a, an fimkhur tawk loh rah an seng. Minute 84-naah Slovenia-in Pecnik hmangin an siphurh an sut.

A hun takah England captain a inlar a, Rooney hian minute 86-naah substitute Theo Walcott pass chu cool takin a pet goal.

Rooney chakna goal hi England tana a goal 48-na chiah niin Gary Lineker-a goal khung zat a nih rual chiah. Manchester United captain hian Sir Bobby Charlton record nihrual turin goal khat dang a la mamawh.

England hian FIFA World Cup zawhah hneh loh an la tawng lo a, 1990-91 season hnua a vawi khatna atan tun season-ah hneh loh nei loin season an hmang tluang bawk.

Hodgson thukhawchang

England manager Roy Hodgson chuan, "Rooney khan hattrick siam se, record siam boruak vel hi reh se ka ti tawh takzet. Kan captain hi player huaisen tak a ni a, Slovenia player-in an nghawk khan player tam tak chu an khel thei tawh lo, a ni chu ṭha takin a khel thei zel a ni," tiin captain a fak.

England boss chuan Wilshere fak zuiin, "Jack-a'n second half a khelh dan kha chu duhthusam a ni. Midfield a thunun a, khatiang kha a lakah kan beisei a ni. A la upa lo a, hmabak eng tak a nei a ni," a ti.