Final-ah James awmna Lakers

LeBron James awmna Los Angeles Lakers chuan tun hnai kum 10 chhunga a vawi khat nan Western Conference final an lut. Lakers hian playoff semifinal series 4-1 a la turin nimin zing khan Houston Rockets lakah 119-96 in hnehna an chang.

Lakers-in conference final an luh hnuhnung ber ṭum chuan legend Kobe Bryant hoin an khel a, 2010 hian NBA title an la zui bawk - tunah chuan James hoin an ropuina ang neih let leh an 

beisei mek.

Kum 41 mi Bryant hi kumin January thla khan helicopter chesualah a fanu kum 13 mi Ginanna leh midang pasarih te nen an lo thi tawh. Chhiatna rapthlak thlen kumah hian an player ropui fam ta pual hian hlawhtlin a duh zual ngei ang.

Rockets lakah Lakers tan hian James-a'n point 29 a nei leh a, ani bakah hian Kyle Kuzma (17 points), Markieff Morris (16), Danny Green (14) leh Anthony Davis (13) ten an thlawp ṭha 

hle bawk.

James Harden-a'n point 30 nei mah se a ṭhiante zingah khel ṭha fal an awm ve lo a, an tum ram thleng zo loin an zinkawng a tawp. Regular season hman zawh takah pawh Lakers hian dinhmun chungnung zawk an luah.

Conference final-ah chuan Lakers hian Los Angeles Clippers leh Denver Nuggets inkhela chak zawk an hmachhawn leh ang. Clippers hian series-ah 3-2 in hma an hruai mek a, nizan khan game 6 khelh niin result kan hre hman lo.