Vawiinah MBBA Season Opening Semifinal BCA Vs VR4; Vikings Vs TBL

Mizoram Basketball As­sociation Season Ope­­ning Tournament chu vawiin hian Hawla In­door Stadium, Republic Veng­thlangah khelh a ni dawn.

Tlai dar 5:00-ah MSL finalist Zarkawt BCA-in Division I club Chawnpui VR4 an hmachhawn ang a, zan dar 7:00-ah MSL champion Khatla TBL leh Mission Veng Vikings an inkhel bawk ang.

Zarkawt BCA Vs Chawnpui VR4

Team pahnih hi First Division-a an awm ho laiin vawi thum an inkhel a, Zarkawt BCA vawi hnih an chak a, Chawnpui VR4 vawi khat an chak.

BCA-in captain Dave bakah Faka, Mama, Lal­sawma leh V-te chhawr thei lo mah se Dennis, Henry leh Zorinsanga te hi team tan innghahna tlak an ni.

Chawnpui VR4 hian MSL Playoff-a an pla­yer Lalnoa, Lalawma, Zorema leh Zodina te an chhawr thei dawn lo. Amah­erawhchu coach/player K. Vanlalruata chu team inghahna a ni a, outside shooter Achhuana leh tun tournament a che ṭha Mawia te nen an khelh­fuh chuan Zarkawt BCA an barakhaih theih ang.

Mission Veng Vikings Vs Khatla TBL

Khatla TBL-in awlsam takin semifinal an lut a, final kalkawng erawh a awlsam tluan dawn lo. MSL champion-in Mission Veng Vikings an hmachhawn dawn.

Khatla TBL-in MSL MVP Mapuia bakah Muana, Gospel-a leh Nelson te an nei a, Pratham singh leh team captain Lana te chhawr thei lo mah se MSL-a ṭum hnih an hneh tawh Vikings lakah an zam lo ang.

Vikings-in BCA pla­yer hlui Saron Veng tlang­val Kima an la lut thar a, Lalrina, Moses leh Puipuia te nen Khatla TBL hneh an tum dawn a ni.