South Africa buaina a zual zel

FIFA World Cup 2010 South Africa-in an thlen theihna tura CONCACAF vote lei nan dollar maktaduai 10 South Africa sorkarin a seng anga sawi chungchangah South Africa-in World Cup an thlen theihna tura hmalatu langsar tak Tokyo Sexwale a ṭawngchhuak a, thamna sum chelek anga an puhna chu thudik a nih theih thu a sawi.

South Africa sorkar chuan puh an nihna hi pha in dollar maktaduai 10 hi Caribbean football hruaitu te hnenah an pe ngei tih erawh a pha lova, pawisa an pek chhan erawh thamna sum ni lo in Caribbean huam chhung ram te'n football lama hma an sawn theih nana an ṭanpuina a nih thu an sawi thung.

2010 South Africa World Cup bid team leh local organising committee-a member Sexwale chuan South Africa sorkar ṭanna hi a dem a, an sum chelek ṭanpuina sum anga an sawi chu thudik tawk lo nia a hriat thu a sawi.

Sexwale chuan, "South Africa sorkar thusawi hi a dik takzet a nih chuan ṭanpuina sum an pekna document khawiah ngei an dah ṭhat? Ngatinge kan budget-ah khan dah tel a nih loh? sum an hmanna chu hmuhtheihin khawiah nge a awm?," tiin South Africa sorkar chu zawhna a zawt.

South Africa sorkara minister te pawh lo ni tawh Sexwale chuan, "Ka zawhna zawng zawng chhanna hi a awm lo a nih chuan FBI kuta dah a him berin keichuan ka hria. Khatih hunlai khan Caribbean football hruaitu te hnena pawisa pe tu zingah pawh ka tel ngei a, a hunlai chuan khatiang tih theih kha a hlimawm em em a ni. Mahse, tuna zawhna ka neih tak chu engtinnge kan thil ṭha tih te kha a parchhuah a hriat a nih?" tih hi a ni tiin ṭanpuina sum pe anga a hunlai chuan a inngaih ve hman tho thu leh a hmanna erawh hriat zui a awm loh thu a sawi. SZexwale hian mimal hming a rinhlelh zawng erawh a sawi chhuak duh lo a ni.

US Department of Justice-in eiruk thubuai nei anga a sawi an hming a tarlan duh loh zingah Sewale hi a tel ve tho nia hriat a ni a, mahse Sexwale hian he puhna erawh a pha nasa hle.