FIFA buaina Sepp Blatter-a'n FIFA president a chuh leh mai thei!

FIFA president kalchhuak tur Sepp Blatter chuan amah thlak zotu tur mi ṭha a hmuh loh chuan a chhuahsan tak hna ngai chelh leh turin chuh leh a tum.

Kum 79-a upa Blatter hi thla hmasa lawk khan a vawi nga nan FIFA president-ah thlan tlin a ni a, eiruk thubuai vanga FIFA a mualpho leh buai vangin thlan tlin a nih aṭanga ni li hnu lawkah a hna aṭanga a ban tur thu sawiin a aiawh tur hi kumin December thlaah thlan hman beisei a ni.

Swiss pachal Blatter hian rei lo teah meeting a ko tura ngaih a ni a, a vawi ruk nana FIFA president ni leh turin thlawptu a neih ṭhat tawk tawk loh a ngaihtuah dawn a ni.

Blatter-a'n khawvel a bawl em ni?

June 2-a FIFA president aṭanga a ban thu a puan ṭuma FIFA president thlan ṭhat hunah pawh a chuh tawh loh tur thu sawitu Blatter hi a thusawiah a ding nghet ngai lo.

Blatter hian kum 2011 khan FIFA president a chuh leh tawh loh tur thu a sawi tawh a, mahse amah thlaktu tur mi ṭha a hmu lo nia insawiin a thusawi tawh sa hi sutin president ni turin a chuh leh.

Asia leh Africa khawmualpui thlawp­na a hmuh ṭhat avanga FIFA president atana tling leh mai ṭhin Blatter hian president hi a chuh leh a nih ngat chuan amah duhlohna a bik takin Europe khawmualpui velah a sosang hle turah ngaih a ni.

Tunhnaia eiruk thubuai vanag FIFA mualphona pawh hi Blatter-a dik loh vang nia ngai tam tak an awm a, a ban thu a puan pawh khan amah thlaktu tur thlasik huna thlan ṭhat nghak kher loa a office chhuahsan tura nawr tu tam tak an awm tawh.

Kum 17 chuang FIFA president office lo luahlum tawhtu Blatter hi a ban mai loh chhanah amah thlaktu tur ama thunun theih zawn tum anga sawi a awm hman a, mahse tunah chuan amah ngeiin chuh leh a tum vang niin a lang ta.

FIFA thuchhuak a dang

Blatter-a'n president nih tuma a beih leh maitheih thu a than laiin FIFA audit and compliance committee chairman Domenico Scala chuan, "Tuna pawimawh ber chu kan lo sawi tawh anga president thar nei tura hmalak a ni," a ti.

Scala thusawi hi Blatter-a'n Asia leh Africa thlawpna ala hmuh vanga president hna a bansan leh loh maitheih thu Swiss newspaper Schweiz am Sonntag-in an chhuah hnu lawka a sawi a ni.

Blatter thlak zo thei tur candidate zawng tura FIFA-in an ruat Scala chuan, "Kei chuan FIFA inthlak danglam leh insiamṭhat hi ka thupui ber a ni," tiin Blatter-a'n president chuh leh a tum anga an sawina chu a thlawp loh hmel hle.

Tunhnaia Scala ṭawngkam hi Blatter nen an inkara inthlawp lo zawnga thu leh hla a awmna hmasa ber a ni. Swiss-Italian Scala hian FIFA inthlak danglam theihna tura a ruamhman naah chuan FIFA chhungkuaa sum leh pai che vel langsar zawka khawih a nih theih dan tur te, FIFA president leh executive committee member te'n a rei berah term thum (kum 12) chhung bak an nihna chelh zawn theih loh tih te a ni.

Blatter hian FIFA president hi chuh leh a tum a nih chuan amah duh lo tu langsar tak UEFA aṭangin do na a dawng nasa hle tura ngaih a ni.