Euro qualifier Spain-in Belarus an hneh

Pathianni zan khan Euro qualifier group C inkhelah Spain-in Belarus an lenchilh a, 1-0 a hnehna chang chungin an ṭin.

Borisov Arena-a inkhelah hian team ṭha zawk Spain-in inkhel an thunun tluan chhuak zak a, goal awmchhun hi minute 45 naa Cesc Fabregas free kick aṭanga David Silva thun a ni.

Blearus tlar hma tan khawvela tlarhnung ṭha ber pawl Spain tlarhnung sut hawn a harsa a, zan sut hawn chhunah Real madrid keeper Iker Casillas-a'n ṭha taka a lo dan sak zel bawk si avangin goal dang luh belh tawh loin inkhel an ṭin a ni.

De Gea aiah Casillas

Spain squad-ah hian Spanish club lian Real Madrid rim lai leh Manchester United keeper ni bawk David De Gea leh Real Madrid keeper Casillas te an awm dun a, Real-in Casillas thlak tura an duh De Gea hi Spain coach Vicente del Bosque-a'n a ring lo zawk. Kum 24 leka upa keeper aiah kum 34 lai kai tawh leh tawnhriat ngah zawk Casillas a luh tir a, a tisual lo. Spain veteran keeper hian goal ngei tura ngaih vawi hnih vel a lo dang thei a ni.

Del Bosque thukhawchang

Spain coach Vicente del Bosque chuan, "Ka ngaihtuahna leh thlir dan a dik avangin second half ṭan tir lamah kan buai ve deuh tih loh kha chu ṭha takin kan khel a ni. Inkhel kan thunun a, chance tam tak kan insiam thei. A pawimawh ber chu ka player te an ni a, khawvel club ṭha ber ber a an player rinrawl ni thei ṭhiau enkawl hi a nuam a ni," a ti.

Belarus an hnehnaa a vawi 100 nana Spain kaihruaitu Del Bosque chuan, "Zinkawng thui tak ka zawh a, ka zinkawng thui takah hian a chang chuan ka hlim em em a, a changin ka lunghnur em em thung. Tuna pawimawh ber erawh kan hmalam hun a ni a, eng ang taka ṭhain nge kan khelh chho zel theih kan thlir dawn nia," tiin hmalam a thlir thu a sawi.