Newcastle chunga lawm lo Gutierrez

Jonas Gutierrez chuan Newcastle-in an enkawl dan leh a contarct a tawp danah a lungawi loh thu a sawi.

Argentine midfielder Gutierrez hi a serh cancer vangin thla 18 chhung a inkhel thei lo a, hlawhtling taka zai a nih hnuah March 4 khan lo kirin St James' Park-a Manchester United nen an inkhelh ṭumin a inlan. Season liamta Premier League match hnuhung berah goal khungin Newcastle chuan 2-0 a West Ham hnehin EPL-ah an in hamtan theih phah.

A cancer zai hlawhtlin a nih hnuah ṭha takin inkhel leh thei mah se Gutierrez hi John Carver-a'n 'phone call' hmangin a contarct an pawhsei sak loh tur thu a hrilh. Phone hmanga hetiang thu hrilh an nih avang hian Gutierrez hi a lawm lo hle.

Kum 31-a upa Gutierrez chuan, "Ka chunga hetiang thil an ti mai hi kei chuan min tham lo hleah ka ngai. Newcastle tan hian kum sarih chhung chu ka theihna ka lo hlan tawh a, tun hnai thla 18 chhung ka damloh avanga ka inkhelh theih loh vangin ka chunga hetiang thil an ti mai hi ka hrethiam lo hle," a ti.

Contract thar a beisei vang pawh niloin ṭha taka inhrilh chu awm a tih thu sawin Gutierrez chuan, "Hetiang thutlukna lian tham hi chu hmaichhanah inbiain kan inhrilh turah ka ngai. Season tawp rual khan ṭha taka inbiak hnuah inhrilh ni ila a duhawm hle. Fan te chungah min thlawpna avangin lawmthu ka sawi e," tiin a sawi.

Kum 2008 a Mallorca aṭanga Newcastle a pan hnuah Gutierrez hian a club tan match 205 khel hmanin goal 12 a khung. A serh cancer an zai zawh hnuah Gutierrez hi chemotherapy hmanga enkawl chhunzawm leh niin tunah chuan ṭha takin a inkhel leh thei tawh.