MotoGP Yamaha rider el pha an awm lo

Catalunya Grand Prix chu Pathianni khan tlan zawh a ni leh ta a, intlansiak hnuhnung pathuma hnehna chang vek tu Movistar Yamaha rider Jorge Lorenzo chuan hnehna chang lehin a zawnin vawi li pakhatna a ni ta.

Lorenzo team-mate Valentino Rossi chu pahnihnaah thlengin Yamaha rider pahnihte hi rider World Championship-ah point khat chauhin an inthlau tawh. Point 138 hmutu Rossi-a'n hma ala hruai rih a ni.

Pathianni intlansiakah hian MotoGP World champion nilai Honda rider Marc Marquez chu Lorenzo nen hmahruaitu nih an inchuhnaah chesual palhin intlansiak a hmachhawn tluan thei lo. Marquez hian a champion lallukhum a hloh ngei dawn niin a lang ta.

Khawlum vangin Gran Premi Mon­ster Energy de Catalunya-ah rider te tan intlansiak a harsa deuh niin a lang a, tlankawng hi 120 degrees dawn laiin a lum a ni. Pole position aṭanga bul ṭan Suzuki rider Aleix Espargaro chu kawng kawi hmasa berah Lorenzo hian tlan pelin a tawp thlengin Lorenzo el phak an awm lo.

Lap lina aṭangin Rossi-a'n pahnihna dimhmun rawn luahin a team-mate Lorenzo nen an inthlauhna hi second 1.5 a ni. World champion vawi kua lo ni tawh Rossi hian theihtawp chhuahin um mah se intlansiak zawha an inthlauhna chu second 0.885 a ni ta tho.

Marquez-a team-mate Dani Pedrosa chu pathumnaah thlengin pakhatna Lorenzo nen an inthlauhna hi second 19 lai a ni thung.

Yamaha rider Bradley Smith nen nasa taka an inbeih hnuah Ducati rider Andrea Iannone chu palina dinhmun a luah hram bawk.