United-a cham tum Van Persie

Manchester United striker Robin van Persie chuan nipui transfer-a Old Trafford chhuahsan tur anga thuthang awm chu phain a contract tawp thleng Manchseter khawpuiah cham a tum thu a sawi.

Kum khat dang cham tura contract la nei mek Van Persie hian Old Trafford-a an pu thar a Dutch pui Louis van Gaal hnuaiah beisei anga hmun pawimawh a chan loh avangin June thla tir lam khan United-a a dinhmun chu ngaihtuah chian a ṭul thu a lo sawi tawh a ni.

Season liamtaa Premier League match 27 a inlan a goal 10 chiah khung thei striker chuan, "Ka hmalam hun ngaihtuaha ka buai leh buai loh min zawh chuan a chhanna chu ka buai loh thu hi a ni. Tunah hian hahdam takin ka hun ka hmang mek," tiin hmalam hun ngaihtuahna in a tihbuai loh thu a sawi.

Arsenal striker hlui Van Persie chuan, "Inthlak danglam ngai a awm tih chu ka hria a, mahse chu chu ka kutah nilovin Manchester United kut a awm a ni. August thla khian kum 32 lai tling ve tawh dawn mah ila kum riat dang la inkhel leh turin tha thona ka la nei a ni. Nakinah chuan football inelna hautak leh khirhkhan tak hmachhawn tur chuan ka tlin tawh lo maithei a, chutih hunah chuan ka inpawm ve mai ang. Tun dinhmunah erawh inelna hautak tak hmachhawn tur pawn ka la ṭha tawk a, ka in fit em em a ni," tiin level sang bera khelh a duh rih thu a sawi.

Italian club Juventus, Lazio leh Turkish club lian Fenerbahce te'n an rim mek anga an sawi Van Persie chuan, "Ka tan chuan first team a khelh hi a pawimawh ber chu a ni a, kum 36 emaw 37 ka nih hunah te chuan ka tlin tawh kher lo ang. Mahse, tun ang kumah chuan first team-a tel zel hi ka duh a ni," tiin inkhelh tam a duhthu a sawi bawk.

Inhliam ngun anga mipui sawiselna chhangin kum 32-a upa striker chuan, "Ka dam ṭhat phawt chuan first team ah ka tel ziah a, inhliam ngun anga sawiselna ka tawk bawk. Mahse, season hman zawh takah khan vawi khat chiah ka inhliam a ni. Football hi chawlhsan mai tumna ka nei lo a, an chawlhsan hma vanga inchhir tak tak hi ka hre nual a ni," a ti.