Croatia leh Italy tibuaitu 'Swastika'

Zirtawpnia Euro qualifier group H a hmahruaitu nih inchuh Croatia leh Italy in­khelh zawha sawi hlawh chu inkhel result nilovin field chhunga 'swastika symbol' tia an sawi ṭhin lo inziak a ni.

Swastika hi Juda ho suat ṭeuhtu Nazi Germany hunlaia Nazi ho chhinchhiahna sawi nan hman a ni ṭhin a, field chhunga Nazi chhinchhiahna lo lang hi chawlh lawk hman a nih laiin a lang chiang lehzual a, tihreh tuma beih ni mah se tih reh theih a ni lo.

Nazi chhinchhiahna hi field chhunga hnim chemte/hriamhrei hmanga zai chhiata siam a ni nge, rawng hmanga hnawih a ni zawk hriat a la ni lo.

Croatian Football Federation chuan he thil duhawm lo tak avang hian ngaihdam dilna an tichhuak nghal a, Croatian Football Federation (HNS) thupuangtu Tomislav Pacak chuan, 'He thil thleng hian kan ram hmai a tibalin mawi lo takin khawvel mithmuhah min pholang a, police te'n a ti tu an chhuichhuah vat a ngai dawn a ni," a ti.

Tomislav Pacak chuan sawi chhun­zawmin, "Kan hriat dan chuan Nazi chhinchhiahna hi inkhelh hma darkar 24 emaw darkar 48 na vela an lo siam niin a lang a, inkhelh huna a lanchian theih dan tur berin an ruahman a ni," a ti.

HNS thupuangtu chuan mipui te hnen­ah ngaihdam dilin, "Khawvel hmun hrang hrang a television kal­tlanga kan inkhel entu te hnenah ngaihdam kan dil a, team pahniha tel zawng zawng te leh Italy aṭanga kan khual ṭha zawng zawng te chungah ngaihdam kan dil a ni," a ti.

Croatian football association president Davor Suker chuan, "Tuna kan harsatna hi kan lo tawh fo tawh ṭhin harsatna ngai tho kha a ni a, siam ṭha turin theihtawp kan chhuah ang. Tuna ka sawi theih awmchhun chu ka thinrim takzet a ni tih zawng hi a ni, " tiin a lungawi lo hle.