Milan-a kir hreh lo Ibrahimovic

French Club Paris Saint-Germain striker Zlatan Ibrahimovic chuan a club hlui AC Milan lama kir leh tur anga an sawi chungchangah Paris a ala cham tur thu sawi mah se a ṭawngkam aṭangin Milan a kir leh a hreh loh hmel hle.

Kum 33-a upa striker chanchin ngah tak chuan, "PSG-ah hian kum khat dang cham turin contract ka la nei mek a, ruahmanna dang ka nei lo. Mahse, thil hi chu a inthlak danglam thut thut reng a ni," tiin Milan-a kir leh tur anga an sawina a chhanglet.

Swedish striker chuan, "Tunah chuan chhung­kaw pa ber ka ni tawh a, ka club khelhna tur thlan chungchangah pawh tunhma ang kha ka ni tawh lo. Football ringawt a ngaihtuah theih loh a, ka chhung te'n kan chenna nuam an tih dan leh kan chenna tur khawpui a zir tea thutlukna siam a ngai tawh a ni," tiin a chhungte a ngaihtuah tel a ngaih thu a sawi.

2014-15 Serie A season hmang chhe tak AC Milan hi table-ah sawmna an ni phak ṭawk a, season tharah Europe-ah an inlan dawn lo. Champions League khel lo tur club tan player ṭha lakluh a harsa.

Mahse Ibrahimovic erawhin Champions League a dah pawimawh loh thu a sawi. Milan tan match 85 a inlana goal 56 lo thun tawhtu chuan, "Mi tam zawk chuan Champions League ringawt hi emaw pawimawh an ti a, mahse a ni lo. Ka tana pawi­mawh ber chu nuam ti taka ka inkhelh theihna club leh hun nuam tak ka hman theihna tur club hi a ni," a ti.

Barcelona tan pawha lo khel tawh striker chuan, "Champions League nomawi chawi lova football ka chawlhsan ta a nih pawn a pawina ka hre lo. Career duhawm tak ka hmang tho tho a ni," tiin a nomawi chawi tawhah te a lungawi tawk thu a sawi.

Ibrahimovic hian kum 2001 khan Milan aṭangin PSG hi a pan a, kum hnih San Siro-a a cham chhungin 2010-11 Serie A title a la a ni.