Copa America Brazil tan captain Neymar a inlâr

Nimin Thawhṭanni zing khan Temuco-ah Brazil leh Peru ten Copa America 2015-a an game hmasa ber an khel a, captain Neymar-a goal leh hun tawp dawna Douglas Costa goal khung hmangin Brazil 2-1 in an chak.

Brazil hian nikum FIFA World Cup an ramah an thlenga, semifinal-ah Germany lakah 7-1 in an mualpho. An rilru na thawidam nan Copa America champion ngei an tum.

An match hmasa berah Brazil hian an defender te inthlahdah vangin minute thumna lekah si an phur. Peru forward Christian Cueva chuan goal hmahruai khungin a zawna vawi 10 chak tawh Dunga naute a barakhaih hle.

David Luiz back pass chhe tak mai chu goalkeeper Jefferson-a'n a lo pet chhuak fuh vak lo a, ball lo dawngtu Cueva hian yard 10 aṭangin a hlah lo chiang hle.

Brazil an buai phah lo, Barcelona player pahnih kan hmu zui nghal zat. Mual dinglam sir aṭanga Dani Alves ball cross ṭha tak mai chu vengtu nei lo Neymar-a'n minute nganaah a tauh goal chiang hle.

Brazil tan captain Neymar chuan freekick aṭangin goal a khung leh teuh hle bakah Fred leh Filipe Luis te'n an hun ṭha neih an chhawr ṭangkai thei lo bawk.

Goal khat ve ve khungin an ṭin mai dawna a lan laiin Neymar kan hmu leh a, a goal khatna siamsaktu Alves a ball pek chu ṭha takin pet mah se goal sirah a kal hlauh. Mahse, Shakhtar Donetsk attacking midfielder Costa kan hmu zui zat a, ani hian minute 90-ah goal khungin Brazil 2-1 in a chak pui.

Player pakhata innghat an nih loh thu sawiin Brazil manager Dunga chuan, "Kan team hi player ṭha pakhata innghat kan ni lo. Neymar hi player ṭha leh pawimawh tak chu a ni, mahse Copa America khelh hi Europe a inkhelh nen a danglam em em vek avangin kan zavai hian kan pawimawh dan a inang vek. Team khat kan nih avangin thawhhona ṭha a pawimawh," tiin a sawi.

Ram tana a goal 44 na khungtu captain Neymar chuan, "Goal tam zawk khung zel ka duh, amaherawhchu a pawimawh ber chu thawhhona ṭha hi a ni. Ṭhiante goal khung tur siam sak leh puitu nih zel ka duh ber," tiin a sawi ve bawk.

Group C inkhel dangah Vene­zuela chuan Jose Salomon Rondon goal khat thun hmangin Real Madrid star James Rodriguez-a te ram Colombia an barakhaih bawk.

Colombia hian Chelsea player Juan Cuadrado bakah Monaco striker Radamel Falcao an neih bakah Arsenal goalkeeper David Ospina an nei bawk. Mahse an game hmasa berah hian beisei an phak lo hle. Venezuela tan minute 60 naa goal khungtu Alejandro Guerra chuan an goal hnihna a khung teuh hle bawk.

An chak dan sawiin Venezuela manager Noel Sanvicente chuan, "Colombia khan player ṭha tak tak an neih avangin a mimal tin khan kan veng uluk hle. Tumah kha hun leh hmunawl pek miah loh kha kan tum ber a ni tawp mai. Chutiang tur chuan kan thawkrim bawk a, hnehna kan sual chhuak a ni," tiin a sawi.

Nilaini zing hian Group B inkhel a awm leh dawn a, an match hmasa ber a Paraguay laka hnehna chang zo lo Lionel Messi a team Argentina chuan Uruguay an hmachhawn ang. Argentina manager Gerardo Matino-a'n plager ṭha rual a chakpui zo lo leh a nih chuan sawisel a hlawh tawh hle ang.

Nilaini zing inkhel tur

02:30 AM Paraguay Vs Jamaica

05:00 AM Argentina Vs Uruguay