NBA Final Warriors-in hma an hruai leh ta

Golden State Wa­rriors guard Stephen Curry chu Cleveland Cavaliers guard Matthew Dellavedova-a'n veng mah se minute 1 leh second 22 chiah a awm tawh tihin 3-Points a lut a; Curry-a'n a awm a chum a, chung lam a kawk nghal a, Oracle Arena-a inkhel entu mipui 19,596 ten awm ngaihna an hre lo.

Warriors-in Thawhṭanni zing khan an home-ah Cavaliers 104-91 a hnehin series-ah 3-2 in hma an hruai a, champion turin vawi khat chak chiah an mamawh tawh. Nilaini zing dar 6:30 khian Quiken Loans Arena, Cleveland-ah Game 6 an khel ang.

NBA Final Game 5-ah Curry-a'n MVP class a pholang a, Warriors guard hian point 37 a score a, 3-points vawi sarih lai a lut bawk. NBA final khelh tawhah series 2-2 hi vawi 28 a awm tawh a, vawi 20-ah Game 5-a chak an champion zui a, statistics aṭanga thlir chuan kum 1975 hnuah Warriors an champion dawn niin a lang.

Curry (37 pts, 7 reb & 4 assists) chetṭhat zan hian Cavaliers star LeBron James a ropui tho a, LeBron hian 40 points, 14 rebounds leh 11 assists zet a nei a, amaherawhchu team ang­in an vanneih zan a ni lo.

Game 5-ah team pahnih an inhnehtawk a, quarter thumna thleng­in a sang zawk point sarih bakin an fal lo a, Cavaliers hi second quarter-ah point sarihin an sang zawk.

Third Quarter-a LeBron-a'n 3-points a luh ṭum phei chuan mipui thawm aṭangin Warriors supporter-te an hlauthawng tih a chiang hle. Amaherawhchu Warriors tan Curry chauh a che ṭha lo a; Draymond Green (16 pts, 9 reb & 5 assists) leh Andre Iguodala (14 pts, 8 reb & 7 assists) te an che ṭha a, reserve LeAndro Barbos-a'n point 13 zet a score bawk a, squad chhah zawk Warriors an chak.

Cavs star James chuan, "An veng lo a ni lo. Uluk taka venna hnuai­ah Curry khan a lut a ni. League-a shooter ṭha ber a ni a, tih theih vak a awm lo," tiin Curry a fak.

Warriors coach Steve Kerr chuan, "Ṭan chiah aṭang khan Curry chet ṭhat zan tur tih ka hre thei a, inkhel tluan khan a khel ṭha takzet a ni," a ti.