Newcastle enkawl a hautak dawn - McClaren

Premier League club Newcastle United manager thar Steve McClaren chuan a club thar enkawl chu hna hautak tak a nih tur thu a sawi.

England manager hlui McClaren hian John Carver thlakin kum thum chhung cham turin kar hmasa khan Magpies nen inremna an siam a ni.

St James' Park-a a hna tur chungchang sawiin McClaren chuan, "Newcastle hi English club zingah chuan club lian ber te zing ami a nih avangin a enkawl hna thawh hi a awlsam dawn lo. Amaherawhchu ka tawnhriat neih tawh hi ka hman ṭangkai theih ngei ka beisei. He hna hi keimah mai chuan thawh hlawhtlin theih a ni dawn lo a, player te mai bakah fan te ṭawiawmna ṭha ka mamawh hle ang," tiin a sawi.

Season liamta khan Newcastle hian Premier League-ah point 39 hmuin season thara Premier League khel turin an match hnuhnung berah an inpet tling hram a ni.

McClaren hian England bakah Middlesbrough, FC Twente, Wolfsburg, Nottingham Forest leh Derby County te lo enkawl tawhin hnuhma a nei hnem tawh hle.